Ich Ott von czinczendorf, vnd ich Jans von Sousenekk, vnd mit vns Chunrat von Meilesdorf, Ditreich der czauchinger, Jans von Snekkenrout, Jans der Glouzzer, Marchart der Neunbalder, Wir veriehen all gemainchleich an dem offen prief vnd tun chunt, Daz vns der erbaer Geistleich herr Abt Engelschalh cze Seydeinsteten, von dem vnd von des Gotshaus wir belehent sein, czv einem recht tag fur sich vordert gegen Steyr in di stat, den er gab noch des erbern herren hern Reynprechts von Wallse rat, czv den czeiten vogt des Gotshaus cze Seydeinsteten, Otten dem Wasnaer vnd hainreichen von laitzedorf seinem swager vnd seiner housurown Chunigunten noch ir gepet vnd wilchur, fur sich vnd für sein erber belehent man gab, cze flust vnd cze gewinn in paidem, vmb den hof in der aw gehaizzen, der recht lehen ist von dem erbern Gotshaus tze Seydeinsteten, dar vmb sev chriegten nach Alrams saeligen Ottein des Basnaer vater tod. Do wurd wir nider geseczt vnd geuordert von des erbern Geistleichen herren wegen, der vorgeschriben stet. Wir ertailten vnd erchanten in ein recht nach ir paider furleg vnd vrchund, vnd waz daz auch ir will vnd ir gepet, do veruolgt wir all mit einander vnd ertailten nach gemainem rat, darnoch vnd wir horten ir paider furleg vnd vrchund, iz scholt hainreich vou leuczendorf vnd sein hausurow chunigunt mit Otten dem Basnaer noch seiner prief vnd vrchund sag in dev, vnd von dem Gotshaus cze Seydeinsteten lehen war, geleihen erbtail nemen. Waz auch der ee genant Otteins vater Alram oder sein muter cze gelten hinder in lazzen habent, wie vil, oder vmb wev daz sei, dem rechten erben Otten dem Wasnaer, do mit er seinen vater vnd sein muter saeligen eehaft not vertzogen hat, des der ee genant Ott der Wasnaer Hainrichen seinen swager vnd vrown Chunigunten sein housurown rechtleich geweisen mag, daz schol Hainreich alles gelten in als geleihen tail, als er di hab erben wil, vnd schol Ott den selben Hainreichs vnd seiner housurown erbtail cze pfant als lang nutzen vnd inne haben, vntz daz Hainreich seinen tail, der im geuellt tze gelten, gantz vnd gar verricht vnd gewert, iz sei mit beraitem gelt, oder mit andern pfanten, oder mit andrer gewishait. vnd wenn daz geschieht, so schol der erbaer Geistleich herr Abbt Engelschalh oder sein nachchomen Hainreichen vnd sein housurown irs erbtails setzen an nutz vnd an gwer, vnd schol sev Ott dar inne nindert irren. Den spruch hab wir gesprochen an alles, geuar durch recht vnd haben auch gesprochen des spruches, isleihem ainen prief von dem offt genanten herren Abbt Engelschalhen cze Seydeinsteten. Vnd daz di red vnd der spruch des priefs war sei, daz betzeug wir all gemainchleich, di oben an dem prief geschriben sind, mit vnsern anhangunden Insigeln, Vnd sint auch des spruchs getzeug Otakcher der Wolfstain, Hainreich der Pernawer mit iren anhangunden Insigeln vnd andrer erbaer lout genug. Daz recht ist ergangen vnd der spruch gesprochen cze Steyr in der stat, Do man czalt von Christes gepurd Drevtzehen hundert iar vnd Noun vnd funftzg iar, an dem negsten Sunntag noch vnsrer vrown tag, cze der Schidung.

Source Fulltext: RAAB, Seitenstetten (=FRA II/33, Wien 1870) S. 238-240