Ich Jans, Maister Jansen sun saelig, mit allen meinen Erben vergich offenleich vnd tun chunt allen den, de den prief an sehent oder lesen horent, Daz ich mit wolpedachtem mut vnd meiner pesten freunt rat, zu der zeit, do ich iz wol tun macht, recht vnd redleich meine czway czehenthaus mit allem. vnd czu den czehent gehort. chlainn czehent vnd grozzen. de ich cze lehen han gehapt von meinem genaedigen Herren Apt Engelschalchen vnd von dem gotzhaus Seydeinsteten. vnd paide gelegen sint in sand Michels pfarr, daz ain gehaizzen ist auf der oed. daz ander an dem aigen. de ich ledichleich ze chauffen geben han meinem vorgenanten erwirdigem herren apt Engelschalchen cze Seydeinsteten vmb sechsthalb pfunt pfenning wienner munzz, der ich gancz vnd gar verricht vnd gewert pin an allen schaden. also peschaidenleich. daz der vor geschriben mein genediger Herr apt Engelschalch cze Seydeinsteten de egenanten czehent verchauffen. verseczen. geben verleichen mag. wem er wil. also daz ich noch all mein erben zu den czehent nimmer dhain ansprach haben schullen. Waer auer daz, daz der vorgenant mein genediger Herr apt Engelschalch ze Seydeinsteten der egeschriben czehent dhain schaden nem von czuspruch. oder von chrieg. wye sich daz gefuegen moecht. den selben schaden schol er haben datz mir vnd datz aller meiner hab. wo ich de hab. ich sein lembtig oder tod. vnd schol seines Schadens da von pechomen mit meinem gutleichem willen. Daz daz hin fur von mir vnd von allen meinen erben staet vnd vnczeprohn peleib. dar vber gib ich vorgenanter Jans den offen prief czu ainem sichtigem vrchunt der worhait. den ich mit meiner aygen hant geschriben han. Versigelt mit meines Oechaims Nycla dez Stiller anhangunden Insigel. vnter dem insigel ich vorgeschribner Jans mit sampt meinen erben mich verpint, allez daz staet ze haben vnd vol furn, daz vorgeschriben stet. wann ich aygens Insigel nicht hab. Der sach ist zeug Dietreich der zauchinger. zu den czeiten richter ze Seydeinsteten mit seinem anhangunden Insigel. Der prief ist geben nach Christes gepurd dreuczehen hundert iar. dar nach in dem sechs vnd sechczkisten iar. an sand Thomas tag.

Source Fulltext: RAAB, Seitenstetten (=FRA II/33, Wien 1870) S. 249-250