Ich fridreich der Angrer vnd mein havsvrawn Chunigunt vnd mit mir alle mein chinder Gangel, Thomel, Chuntzel, hensel vnd all vnser eribn wie di genant sind oder werdnt wir veriehen offenwar gemainleich an dem gegenwurtigen brif alln lewten die in sehent lesent oder horent lesen di nu lebnt oder nach chunftig sind daz wir mit wol verdochtem muet nach vnser pesten vreunt ratt czu der czeitt da wir iz wol getun machten guetleichn vnd vnbetwungenleich habn auf gebn tze rechter furczicht vnserm gnaedigen herren Abpt engeschalichn cze Seyttensteten vnd dem Gotshaus da selbs alles vnser recht daz wir haben gehabt an der swaig tze Anger gelegen in pyberpehher pharr vnd an alln daz dar tzu gehort da von daz wir in solich nat chomen daz wir im vnd dem gothauss darauf nicht dienstleich noch pewleich machten gesitzzen, dar vmb hat vns der obgenant vnser gnaediger herr Abpt engelschalich von seinen besundern gnadn wegen vns verricht vnd gebn für havsrawm newn phunt phennig der wir im schuldig waren für sein rechten dienst vnd vadrung, der hat er vns ledig lazzen vnd hat fur vns golten vir phunt phenig vnd dar czu hat er vns gebn sechs phunt phenig wienner munczz beraitz geltes des wir alles ganzleich tze rechter tzeit verricht vnd gewert sein vnd dor vmb wir vns habn vertzigen der obgenanten swaig cze anger vnd aller vnser rechten dor auf an alles geuer in der mazz, daz wir allew dhain recht noch an sprach oder red hin fur ewigchleich gen der genanten swaig cze anger vnd gen alle lewten die si hin fur werdnt besitzen nymer mer in dhain wegen schulln nach mugen gehabn weder mit recht nach an recht vnd welichz vnder vns sich des vergazz oder ober fur mit red oder mit werich daz ein guetew chuntschaft wer, daz ist tzehant verfalln leibs vnd guetes dem gothauss cze seittensteten sein amplewten vnd auch dem gericht wo man es an chumpt insteten oder in marchten avf wazzer oder auf land hinder welicher herschaft ez wird begriffen. wer affer daz yemant von vnsern wegen hintz der vorgenanten swaig cze anger vnd alles daz durich recht dor czu gehort oder hintz den lewten die si besitzten hieten oder gewunnen dhain ansprach mit recht, des schulln wir ir fur stant sein an aller stat wo in vnd dem Gotshauss cze Seittensteten des mit recht des not vnd durfft geschiecht vnd sulln sew daz habn auf vnserm leib vnd guet vnd dacz vnser trewn hinder welhem herren wir sein vnd sulln vns dor vmb noten vnd phenten mit vnserm guetleichn willn als si nogst mugen. Daz lub wir alles pei vnserm ait stet cze halten an alles geuer. Dar vber cze ainer sichtigen vrchund vnd czewgnuss vnd gelub der obgeschribn sach geben wir vnserm vor genanten gnedigen herren abpt engelschalichn vnd sein nachchom dem Gotshauss cze Seittensteten vnd den lewten tze anger auf der swaig den gegenwurtigen offen briff tzu ainer worn vrchunt vnd sicherhait der versigelt ist mit der erbern wol beschaidn dietr. des czauchinger die czeit richter cze seittensteten vnd Gorgeins der Ratthayminger richter dacz sant peter in der aw vnd wolfhrtes des wasner der der sach ist taydinger gewesen mit irn drin insidl die durich vnser vleizzigen pet willn vnd gezeugnuss ireu insidel an den briff gehangen in an schadn, wen wir selb nicht aister indidel habn hinder dew wir vns ich obgenanter Fridreich der angerer vnd mein havswrav chunigunt vnd ich Gangel, Thomel, Chunczel, haensel sein sun vnd all vnser eribn wie die genant sin oder werdnt von vns verpinten an alles geuer pei vnserm ait vnd trewn alles daz stet cze halten daz obn an dem briff geschribn ist. daz ist geschehn cze seittensteten do man czalt von Christes geburt dreutzehn hundert iar dor nach in dem vir vnd subntzkisten iar an den nesten erich tag vor sand Gorgen tag.

Source Fulltext: RAAB, Seitenstetten (=FRA II/33, Wien 1870) S. 263-264