Jch Herman pfarrer dacz Aschpach vnd all mein nachkomen wir veriehn offenbar mit dem brief alln leutn dy in sehent oder horent lesen, daz her Chunrat von awrach, vraw kathrey sein hausfraw vnd Frikk ir Enenchel dem auch got gnad, haben lediglich gebn dem Gotzhaus ze Aschpach zwo hofstet gelegn in piberpecher pfarr dacz dem doerflein da man iarlich von dyent czehen schilling gueter wyenner pfenning vnd ayn weyhennacht Erung vnd dy hoftet sind auch inwerttaygen gen Gleuzz Also peschaidenleich daz der pfarrer cze Aschpach oder sein Anwalt schol dy selbn hofstet inn habn mit alln nuczn eren vnd rechtn als von alter vnd durch recht dar czue gehorent vnd schol dem Egenantm hern Chunrat seiner hausfrawen alln irn Erbn vnd chinden vnd auch allm irem gesleht iarlich in dem aduent wann im daz fueglich ist vnd daz schol er auch vor den nahsten erbn dy er beraichn mag zewizzen tuen pegen aynn iartag mit ayner vigilig vnd mit dreven messen also daz er schol gebn yedleichem der priester zwelif pfennig, dem schuelmaister zwelif pfennig vnd dem mesner sechs von dem leutn vnd schol gebn Sechsczig pfenig czu dem Gotzhaus da selbs von acht kerczn dy man zu der vigilig vnd czu den messen leihn schol. Auch schol man herrn Chunczn vnd alles seins affterchundes gedenkn ze Aschpach als offt mann da selbs den toetn brief list vnd wo der pfarrer oder sein anwalt in dert saumig weren an den stukkn als oben penant ist, So schulln dy nahstn erbn mit guetleichm willn des pfarrer vnd auch sein vnd seins Gotzhauss vogt der selbn czwayer hofstet wider vnterwindn vnd dy als lang inn habn vncz daz all saumung eruolt vnd erstatt werd. wer awer daz der pfarrer di selbn hofstet von natdurft wegn muezet verchauffn, so schol er sew dy nahstn freunt vor alln andern leutn an vailn, chauffn si ir dann niht, so mag er sew verchauffn andern leutn vnd schol daz gelt mit gueter gwissn an ander grunt anlegn da von daz selgeret volfueret werd als obn geschribn stet vnd daz schol geschehn nach rat der nachstn erbn. vnd daz dy red also stet peleib gib ich obgenanter herman in den brief ze vrchunt bestatigt mit meinem anhangundem insigel. Der sach ist czeug her Stephan pfarrer ze Sundelpurk vnd Ott der Gensel mit iren jnsigeln in on schadn. der brief ist gebn nach Christ purt drewczehen hundert iar dar nach in dem vier vnd Sibenczkistm iar an sant Gallen tag.

Source Fulltext: RAAB, Seitenstetten (=FRA II/33, Wien 1870) S. 265-266