Ich Niclas von Amsteten Vngelter daselbs vnd ze Waydhoffen, Ich Peter vnd ich Stephan sein prueder vnd alle vnser eriben, wir vergehen offenbar vnd tun kunde mit dem brief allen lewten gegenwurtigen vnd chunftigen, di in sehent, lesent oder hoerent lesen, daz der erwirdige geystleich vnser gnaediger here Abbt Engelschalich vnd der ersame gancz Conuent des Gotshaws ze Seytanstetten denn zehentt, der gelegen ist ze Vdmaruelde vmb den markcht vnd wo derselb zehentt in Vdmaruelder phfar oder in andern pharrenn gelegen ist mit aller seiner zugehorung wie der genant ist, den der beschaiden Janns Helffer purger ze Aschspach vnd vraw peters sein hawsuraw vnd ir erben vns redlich verchauft vnd gegebn habn, der selb zehent von den vorgenanten geystleichn vnsern gnaedigen herren vnd dem gotshaws ze Sytansteten lehen ist gewesen, lautterleich Got von besunder gunst vnd gepett vnd auch durch den dinst willn, die wir inn getan habn vnd noch hin fur tun sulln, vns auz der lehenschaft in ein ewigs freyes purkrecht verwandelt, gegeben vnd gemachett habent, Also daz wir alle vnser erben vnd nachkomen furbaz ewichlichn denselbn obgenantn czehent mit aller seiner zugehorung gestift oder vngestift, versuecht oder vnuersuecht, alz derselb czehent mit alter herchomen ist von den egenantn geystlichen herren dem Abbt, dem Conuent vnd von allen iren nachkomen vnd auch von dem egenanten Gotshaws ze Seytansteten ewichleichen ze einem rechten freyem purkchrecht haben nuczen vnd niezzen schulln, so vns daz aller peste fueget alz freyes purgrechts recht ist in dem lande ze Oesterreich, In der beschayden, daz wir alle vnser erben vnd nachchomen oder wer den vorgenanten zehentt hin fur inne haben wirdet vnd besiczet, den vorgenanten geystleichen vnsemn genaedign herren vnd allen iren nachkommen vnd dem Gotshaws ze Sytansteten von dem obgenanten czehentt davon ewichkleichen diennen, raychen vnd geben schulln alle iare iaerleich an sand Michels tag Sechs vnd dreyzzikch wienner phfenning ze freyem purkchrecht an alle widerrede vnd an alles verziechen in alle dem rechten, als man ander freyes purkchrecht in dem lande ze Oesterreich diennet vnd nichtes mere, vnd wan daz hin fur geschech, daz wir alle vnser erben vnd nachkommen den egenanten zehentt welln hin geben vnd verchauffen, so sulle wir in die vorgenantn geystleichen herren den Abbt vnd den conuent ze Sytansteten oder ir nachchomen anvaillen vnd in ze chauffen geben nach erber lewt ratt, ob si in aber dann nicht wellen chauffen vnd waer aber, daz wir vnd alle vnser erben vnd nachkomen nach erber lewt ratt mit den vorgenanten erwirdigen geystleichen herren dem Abbt, dem Conuent vnd allen irn nachkomen vmb den chauff mit inn nicht gesamen moechten, vnd sew vns auch mit dem chauff ze nachen choemen vnd alz vil geltz darvmb nicht geben wolden, alz ander lewtt, so muegen vnd schullen auch wir vnd haben das freyew wal vnd ganczen gewalt anserswo mit dem selben obgenanten czehentt damit allen vnsern frumen schaffen mit verchauffen vnd mit verseczen, schaffen, machen vnd geben wem oder wie wir welln, an alle irrung vnd hindernuzze. Vnd wen wir vorgenanten Niclas, Peter vnd Stephan geprueder nun ze stunde nicht Insigel haben vnd dar vber so gebn wir denn egenanten erwirdigen geystlichen vnsern genaedigen herren dem Abbt, dem ersamen Conuent, allen irn nachkomen vnd dem gotshaws ze Sytansteten den brieff fur vns, vnser erben vnd fur alle vnser nachkommen zu einem offen vrkund der warhayt vnd zu einer ewigen vestigung der vorgeschribn handlung vnd der sache versigilten mit des erwirdigen vnsers lieben herren hern Hainreichs, korherren ze pazzawe, techent vnd pharrer ze tuln vnd Amptman in Oesterreieh des pystums von pazzawe anhangunden Insigel vnd mit der erbern Jansen des liechtenwinkchler, die zeit phleger datz sand peter in der Awe vnd Jansen des Trueben von Amsteten mit ir paider anhangunden Insigiln, die der sache geczeugen sind durch vnser vleizziger pets willn in allen an schaden. So verpinden wir vns obgenante mit sampt vnsern erbn vnd nachkomen vnuerschaidenlich hinder des vorgenanten erwirdigen heren Insigel vnd hinder der erbern Insigil mit vnsern trewn, alles daz staett, waer vnd vnzebrochen ze haben vnd ze volfueren, so vor in dem brief geschriben stet. Der brief ist gegebn nach Christi gepurde Drewczehenhundert iar vnd darnach in dem Ayns vnd Achczkisten iare, an montag vor dem heyligen Auffartt tag vnsers herren.

Source Fulltext: RAAB, Seitenstetten (=FRA II/33, Wien 1870) S. 295-297