Wir Albr. von gotes gnaden Herczog ze Oestereich, ze Steyer, ze Kernden vnd ze Krain, Graf ze Tyrol etc. Tun chunt Vmb die grvnt vnd holtz in sand Michels pharr gelegen, die Seyfrid vnd Hainreich von hinderholtz vnd Gebhart vnd Chvnigund am Steg dein erbaeren geistlichen vnserm lieben andaechtigen .... dem Abt ze Sytansteten vnd seinem Gotzhaus ze chrieg taten, Daz wir gesehen vnd gehoert haben die chuntschaft, die erber alt lewt bey iren trewen darvmb gesagt habent vnserm getrewn Petern den hinderholczer die czeit phleger ze Steyr, wan der von vnsers geschefftes wegen cze beschaw der chuntschaft geschafft vnd gegeben waz vnd dieselb chuntschaft sagt mit namen, daz dieselben grvnt vnd auch daz holcz czu der vorgen. sand Michels chirchen vnd czu dem Gotzhaus gen Sytansteten von alter her vnd ze recht gehoert haben vnd nicht anderswohin, Vnd seind wir nv die chuntschaft also verhoert haben, So mainen vnd wellen wir gar ernstlich, daz es dabey beleibe vnd das die vorgen. grvnt vnd holcz furbaz ewichleich beleiben bei der obgenanten sand Michels Chirchen vnd daz die egen. Seyfrid vnd Hainreich von hinderholcz vnd Gebhart vnd Chvnegund am Steg noch yeman ander von iren wegen fürbaz damit ichtzze schaffen haben in dhain weise. Mit vrchund dicz briefs. Geben cze Steyr an freitag nach sand Michels tag, Nach kristes gepurd dreuczehenhundert iar darnach in dem aynen vnd achczigisten Jare.

Source Fulltext: RAAB, Seitenstetten (=FRA II/33, Wien 1870) S. 297-298