Ich Dyetreich der Refentner von den Winnden vnd ich Chunigund sein hausvraw, wir vergehen offenbar mit dem gegenwurtigen brief vnd tun chunt allen lewtn, di in ansehnt, lesnt oder hornt lesn, daz wir von des Refentz cze Sitanstetn prunst wegn schuldig sein vnd gelten schullen dem erwirdign geistleichen vnserm gnaedign herren ... dem Abbt vnd dem ersamen Conuent des Chlosters. cze Sitanstetn czehen pfunt wienner pfenning, vmb di wir in cze phannt verseczczt haben vnser haws dacz dem Winnden vnd czwai purchrecht dacz Grillenperg vnd den czehent auf dem pretel lehen in der Trefnikch gelegn in Sitansteter pfarr vnd dar czu all ander vnser hab, In der beschaidnuss, wann ich vorgenanter Dyetreich Refentner abgen mit dem tod, so schol ich eegenante Chunigund di Refentnerinn oder wer di vorgeschribn guter vnd hab besiczczen vnd erbn wil, da von dann vnsern obgenantn gnaedign hern cze Sitanstetn di vorgeschriben czehen pfunt wienner pfenning gancz vnd gar richtn vnd geben. Aber di weil eegenanter ich Dyetreich Refentner leb, schol man vns vmb daz gnant gelt nicht noetten. Geschech auch, daz wir als stathaft wurden, daz wir di vorgenant vnser guter vnd hab vor mein obgnantes Dietreichs des Refentner tod mochten vnd wolten ledig machen, des schol man vns stat tun, also daz di gnantn vnser gnaedig herren, di vorgeschribn czehen pfunt pfenning schullen nemmen, vnd schulln vns den gegenwurtig brief wider gebn. Mit vrchund des offenn briefs versigilt durch vnsers vleizzign pet willen mit der erbern, wol beschaidn Otteins des Gaensel von Chrenstetn, vnd Gordeins des Rothaymiger pfleger dacz sand Peter in der Aw czu der czeit, anhangunden Insigil, di durch vnsern willen da mit der vorgeschribn sache czeugn sind wardn, in an schaden. Wann wir selb aygen Insigil nicht habn. Gebn nach vnsers hern Christi gepurd vber dreyczehn hundert jar, im czwai vnd achczigisten jar, an der heylign magt sand Lucie tag.

Source Fulltext: RAAB, Seitenstetten (=FRA II/33, Wien 1870) S. 303-304