Wir Bertoldus von Gotes gnaden Bysschof ze Freysing vnd daz gancz Capitl daselbs vergehn offenbar mit dem gegenwurtigen brief vnd tun chunt vmb di lehenschaft ettleicher czehent, di der erber Ritter, her Fridreich von dem Grabn, auf ettleichen guetern vnd grunten in Aschpekcher pfarr gelegn von dem ersamen geistleichen herrn von dem . . . Abbt ... vnd dem Goztshaws cze Sitanstetn cze lehen gehabt hat, vnd di derselb her der . . Abbt, vnd auch der gancz Conuent desselben Gotshaws durch chunftiger gnaden vnd hillfleicher fuedrung willen, der sew sich von vns vnd all vnsern nachchommen hinfur staetleich wol schullen troesten, vns vnd vnserm Byschtum cze Freysing liebleich habnt ledig lazzen vnd gegeben, czu den vierczik pfunten wienner pfennig, di wir in vnd dem vorgenantn Gotshaws ze Sitanstetn czu einer widerlegung vnd ergeczung dar vmb habn gegebn, hab wir in auch vesstikchleich verhaizzen, vnd wir haben sew ganczleich versichert vnd vergewisst, wann sew oder ir nachchommen hinfur vail vindent czwai pfunt pfenning iarleichs vnd ewiges gellts auf gutern vnd gruntn, di von vns vnd von vnserm Byschtum ze Freysing rechtes lehen sind, di schullen sew freyleich chauffen, also daz wir vnd alle vnser nachchommen sew dar an nyndert schullen irren, weder mit worten, nach mit werchen vnd als palld der chauf geschiecht, so ze hant schullen di vorgenantn czwai pfunt pfenning ewiges gellts vnd auch di grunt vnd gueter mit aller czugehorung von vns vnd von vnserm eegenantn Byschtum cze Freysing ganz vnd gar ledig sein, vnd schullen der obn genantn geistleichen des . . . Abbts vnd des Conuents vnd auch des Gotshaws cze Sitanstetn ledigs vnd freyz aygen sein, an allen irrsal vnd auch an alle widerred. In solicher weys vnd beschaidn, Daz der vorgeschriben wegchsel in vnd dem eegenanten Gotshaws cze Sitanstetn an irm chirchen lehen cze Aschpach vnd andern iren czehentn vnd lehen guetern in Aschpekcher pfarr gelegen hinfur nyndert schol schaden. Mit vrchund des offenn briefs czu pezzer sycherhait versigilt mit vnser vorgenantn Bysschofs Bertolds vnd des Capitl cze Freysing czwain anhangunden Insigilln. Gebn nach vnsers herrn Christi gepurd vber dreyczehen hundert jar, im drey vnd achczigisten jar, an dem heylign Prehentag.

Source Fulltext: RAAB, Seitenstetten (=FRA II/33, Wien 1870) S. 305-306