Ich Hainreich gnant Chasstner von Sitanstetn vnd ich Helena sein hausvraw vnd mit vns all vnser erbn, wir vergehn offenbar vnd tun chund allen lewtn gegenwurtigen vnd chunftigen, di den brief ansehent, lesnt oder hornt lesn, Daz wir mit wol bedachten mut nach vnser pessten frewnt rat, czu der czeit da wir ez auch wol getun machten, recht vnd redleich haben verchaufft vnd cze chauffen gegeben der erbern vrawn vnd wityben Chunigunden der Prantlinn auz vnsrer nucz vnd gwer in ir nucz vnd gwer vnsrew czwai czehenthawser, ainz gehaizzen an der Oed, daz annder an dem aygen, in sand Michels pfarr gelegen. denselben czehent auf denselben czehenthawsern mit aller czugehorung, di auch recht lehn sind von dem erwirdigen geistleichen herren . . . dem Abbt vnd dem Gotshaws cze Sitanstetn vmb ein gellt, des vns wol genuegt hat vnd des wir auch gancz vnd gar gericht vnd gwert sein, da von mag sie mit dem vorgenantn czehent auf den oben geschribn czwain czehenthawsern mit aller czugehorung hinfur allen irn frum tun vnd handeln mit verseczczen vnd verchauffen, mit behalten vnd niezzen, mit geben vnd schaffen, wem si wil, daz schol alles vnser gutleicher will sein, also, daz wir vnd all vnser erbn sew dar an nyndert schulln irren, weder mit worten nach mit werchen. Wir tun vns auch des vorgenanten czehent vnd czehenthawser mit aller czugehorung czu rechter furczicht mit dem gegenwurtign brief in der weys, daz wir vnd all vnser erbn dar auf hinfur chain ansprach vnd chainen chrieg schullen haben, weder mit recht nach an recht. Waer aber daz ir yemant mit recht dar vmb czuspraech, des schull wir ir furstand sein, als recht lehens recht ist, vnd daz schol si haben auf vnsern trewn vnd auf aller hab di wir haben. Dar vber geb wir ir czu einem sichtigen vrchund der vorgeschribn sache den offenn brief versigilt mit der erbern wol beschaidn Gorgeins des Rathayminger, di czeit pfleger dacz sand Peter in der Aw, vnd Purkcharts des Newnburger czwain anhangunden jnsigilln, in an schaden, di durch vnser vleizzige pete willn da mit des vorgeschriebn handeln czeugen sind, hinder di wir vns mit vnsern trewn verpunden haben, alles das staet cze haben, daz oben an dem brief geschribn ist, Wann wir selb aygen jnsigil nicht haben. Der brief ist gegebn nach vnsers herren Christi gepurd vber dreyczehn hundert jar in drey vnd achczgisten jar, an des herren sand Ambrosij tag.

Source Fulltext: RAAB, Seitenstetten (=FRA II/33, Wien 1870) S. 306-307