Ich Johannes Prukkpekch, purger cze Waidhofen auf der Ibse, vergich offenbar vnd tun chund allen lewtn, di den brief ansehent, lesnt oder hornt lesen, Daz der erwirdig geistleich mein gnadiger herr Abbt Engelschalch vnd der ersam Conuent des Gotshaws cze Sitanstetn von besundern gnaden durch meiner dienst willen mir czu rechtem leibgeding habnt verlihen irn vnd desselbn Gotshaws cze Sitanstetn czehent auf dem obern purkckvelld vnd auf dem velld pey dem chreucz vnd auf dem Rabenperig in Waidhofer pfarr, pey der vor genantn stat cze Waidhofn gelegn, den sew langs eemaln meiner liebn hausvrawn, vrawn kathreyn an der prukk cze Waidhofn auch czu rechten leibgeding verlihen habent, In der weyss, dass ich denselben czehent mit allen nuczcen vnd mit aller czugehorung vncz an meinen tod, an der vorgenanten geistleichen herrn stat, auch schol innhabn vnd inuessen. Vnd wann wir paide abgen mit dem tod, so ist der eegenant czehent auf den vorgeschribn vellden mit aller czugehorung in vnd den vorgenantn Gotshaws eze Sitanstetn gancz vnd gar wider ledig vnd los, Allso, daz all vnser eribn vnd frewnt nach vnser paider tagn dar auf chain recht vnd chain ansprach schulln habn nach gewinnen weder mit recht, nach an recht. Mit vrchund des offenn briefs versigillt mit mein vorgenantes Johannis Pruhpekch anhangunden Insigil. Der vorgeschribn sache sind auch czeugen durch meines vleizzigen pets willn der erber herr, herr Thomas Pfarrer cze Amstetn, vnd der erber beschaiden Christan von Waczcz, Purger cze Waidhofn mit ieren anhangunden Insigilln, in an allen schaden. Der brief ist geben nach vnsers herren Christi gepurd, vber dreyczehen hundert Jar, im vier vnd achczigisten Jar, an des heyligen martirer sand Agapiti Tag.

Source Fulltext: RAAB, Seitenstetten (=FRA II/33, Wien 1870) S. 316-317