Ich Gebhart von Hochenekk, ich Dorothea sein hausvraw vnd all vnser eribn, wir vergehen offenbar vnd tun chund allen den, di den brief ansehnt, lesnt oder hornt lesen, Daz wir mit wol bedachten mut vnd mit gutleichem willen nach vnser pessten vnd nasten frewnt weysung vnd rat czu der czeit, da wir daz mit recht wol tun machten vnd ez mit recht nyemant widersprechen macht, nach widersprach, recht vnd redleich haben verchaufft vnd cze chauffen gegeben dem ernwirdigen geistleieben herren ... dem Abbt vnd dem ersamen Conuent des Gotshaws cze Sitanstetn, vnsern hof cze Grillenperg genant, in Sitansteter pfarr gelegen, mit aller czugehorung‚ der rechtez purkchrecht ist von dem ernwirdigen geistleichen herren . . . vom Abbt cze Mannse vnd von seinem Gotshaws, dem man all iar iaerleich auf sand Michels tag fumf vnd vierczik pfennig wienner munzz da von schol geben czu rechten purkchrecht, vmb acht vnd sechczik pfund wienner pfennig, der wir gancz vnd gar gericht vnd gewert sein. Denselben hof cze Grillenperg mit allen purkchrechten vnd mit allen ern, rechten, dinsten vnd nuczczen, di durch recht dar czu gehornt vnd da von bechommen mugen, cze hollcz, cze velld vnd dorff, wismad vnd waid. gestifft vnd vngestifft, gepawt vnd vngepawt, besucht vnd vnbesucht, in allen den rechten, als wir vnd vnser vodern daz allez vnuersprochenleich herpracht vnd gehabt haben, hab wir auz vnser nucz vnd gwer mit herren hannt in aufgebn vnd ingeantwurtt in ir nucz vnd gwer, Also dacz sew da mit hinfur allen iern frum schulln vnd mugen schaffen mit inn haben vnd nyezzen, mit verseczen vnd verchauffen vnd auch geben, wem sew wellnt an alle irrung. Vnd ob Purkchart. meiner vorgenantn Dorothe brueder, nach yndert lebentig war, wann der czu land chaem, dem schull wir seines eribtails ganczleich auzrichten vnd weren in der weys, daz er auf den vorgenantn hof ze Grillenperg mit aller czugehorung nichtes cze sprechen hab, vnd daz des di eegenantn geistleichen herren . . . der Abbt vnd der Conuent cze Sitanstetn an all schaeden vnentgolten beleiben. Wir schulln auch vnd welln vmb den obgenanten hof ze Grillenperg mit aller czugehorung ir recht scherm, geweren vnd furstand sein für all chrieg vnd ansprach an aller stat, wo in des mit recht not vnd durfft geschiecht. Ob in aber an derselben gewerschaft icht abgieng, welicherlay schaeden sew dann des nemment, di ir ayner auz dem vorgenantn Conuent ze Sitanstetn pey seinen trewn vngeswarn vnd vnberecht vor erbern lewten gesprechen vnd bestaetn mag, di schull wir in all gancz vnd gar ablegen vnd widerchern an alle widerred vnd sew schulln derselben schaeden bechommen von vns vnd von aller vnserr hab, di wir haben in dem Land ze Oestereich, auf wazzer vnd auf land, besucht vnd vnbesucht, mit vnserm gutleichen willen, an alle chlag vnd furbot, wir sein lebentig oder tod. Daz der vorgeschribn chauff vnd di red hinfur allso staet vnd vnaerchert beleib, dar vber zu einem sichtigen vrchund der warhait geb wir den vorgenantn geistleichen herren .. . dem Abbt vnd dem Conuent des Gotshaws cze Sitanstetn den offenn brief czu pezzer sycherhait versigilt mit mein eegenantes Gebharts von Hochenekk anhangunden Insigil vnd mit des erwirdigen geistleichen herren Abbt . . . cze Mannse anhangunden Insigil im vnd seinem Gotshaws in seinen rechten an allen schaden. Der sache sind auch czeugen durch vnsers vleizzigen pets willen di erbern wol beschaydenn vnser frewnt Hanns von Hochenekk vnd Allweig sein brueder, Erhart von Russt vnd Haertel der Wasner von Chrellendorf, mit iern anhangunden Insigilln, in vnd irn eriben an allen schaden, hinder di ich vorgenante Dorothea mich willichleich hab verpunden mit meinen trewn, allez daz staet cze haben, daz an dem brief geschriben ist, wann ich selb aygen Insigil nicht hab. Der brief ist geben nach vnsers herren Christi gepurd vber dreyczehen hundert Jar, im vier vnd achczikisten Jar, an des heyligen Martirer sand Viti tag.

Source Fulltext: RAAB, Seitenstetten (=FRA II/33, Wien 1870) S. 309-311