Ich hainreich genant Chastnar von Sitanstetn, Ich Elena sein hawsfraw vnd alle vnser erbn wir vergechen gemainleich mit dem offenn brief allen lawten, die in sechnt, lesent oder hornt lesen, das wir mit wol verdachtm mut, czder zeit, do wir ez wol getun machten nach vnser nachsten vnd pesten frewnt rat, recht vnd redleich habn verchauft vnsern czechnt, den wir gehabt haben auf dem Gut, genant annder Puchen pey dem Gredelek in Sitansteter pharr gelegen, dem ernwirdigen geistleichm vnserm genaedign herren Abbt laurenczen cze Sitanst. auz vnsrer nucz vnd gewer in sein und des Gotshauss cze Sitansteten nucz vn gewer, den selbn zechent wir von im vnd dem Gotshaus cze Sitanst. czu rechtm rechlehen habn gehabt vmb ain gellt, des vns wol genugt, des wir an all schedn czu rechter czeit sein gancz vnd gar gericht vnd gewert, darvmb des oben geschribn czechntz mit aller czugehorung, als wir den emalln genozzen haben, tun wir vns allew mit dem offenn gegenwurtigen brief czu rechter fürczicht, jnder weis, das wir nymer mer chain recht, chain ansprach auf dem vorgenanten czechnt mit aller zugehorung, chlainn vn grozzen, bestift vn vnbestift, gepawt vnd vngepawt, ander puchen schullen nicht haben noch gewinnen weder mit recht noch an recht. waer das in yemant vnserm vorgenantn herren vnd sein Gotshaus cze Sitansteten vmb den obgenantn czechnt czu sprech mit recht, des sull wir an aller stat sein rechter furstand sein vnd sein Gotshaws cze Sitansteten. Tet wir des nicht, welchen schaden er vnd das Gotshaus nement, den ainer aus dem ersam Conuent mag pey seiner gewizzen vngesworn gesprechn, den selben schadn schull wir im vnd seim Gotshaus allen ablegen vnd widerchern vnd schol er vnd das Gotshaus das habn auf vnsern trewn vnd auf aller der hab, di wir habn oder gewinnen, hinder welcher herschaft si gelegen ist, do uon schullen er vnd das Gotshaus der schedn bechomen, als sew nachst mugen mit vnserm gutleichm willen. Ez mag auch vnser vorgenanter genaediger herr vnd alle sein nachchomen vnd daz Gotshaus cze Sitanstetn mit dem offt genanten czechnt allen irn frum geschaffen, wie in das aller pesst fuegt mit vnserm gutleichn willen. Dar vber czu einem warn sichtigen vrchund des vorgeschribn chaufs vnd handlung gebn wir obgenanter hainreich der Chastnaer von Sitanstetn, Ich Elena sein hawsfraw fur vns vnd fur alle vnser erbn vnserm egenanten genaedigen erwirdigen herren abbt larenczn cze Sitanst. allen seinen nachchomen vnd dem Gotshaus doselbs den offenn brief, der versigilt ist mit der erbern beschaidn Gorgeins des Rathayminger, die czeit Richter cze Sitanstetn, vnd Perchtolcz des Stadler czwain anhangundn jnsigiln, di ir jnsigil durch vnser vleizzige pet willen czu czewgnuss der vorgeschribn sach habnt an dem brief gehangen, in vn irn erbn an schaden, hinder dew wir vns verpindn pey vnsern trewn angeuer, alles das stet cze habn, das obn an dem brief geschribn stet, wenn wir aygner jnsigel nicht enhabn. der brief ist gebn, do man zalt von christi gepurd dreyczehn hundert jar vn in dem sechs vn achczikisten jar, an sand Gorgen tag des heylign martirer.

Source Fulltext: RAAB, Seitenstetten (=FRA II/33, Wien 1870) S. 332-334