Ich Dyetreich der Czauchinger, ich Elsbet sein hawsvraw vnd ich Nycla ir sun vnd all vnser erbn, wir vergehn offenbar vnd tun chunt allen laeuten, di den brief ansehent, lesent oder hoernt lesen, Daz wir mit wolbedachtem mut vnd mit gutleichem willn, nach vnserr pesstn frewnt rat, czu der czeit da wir daz mit recht wol tun machten, daz haus vnd di hofstat cze Pyberpach cze naest pey dem freythof tor gelegen, daz mit aller czugehoerung zu sand Stephans Gotshaus cze Pyberbach gehoert, dem man von allter iaerleich ain phunt wachs do van geraicht vnd gedient hat, demselben sand Stephans Gotshaus cze Pyberpach vnd dem pfarrer daselbs ledigleich habn aufgegebn vnd all di recht, di wir dar an gehabt habn, In der weys, daz der pfarrer cze Pyberpach vnd all sein nachchommen des Gotshaus vnd irn frum vnd nucz da mit schulln schaffen, vnd wann wir vorgenant Dyetreich vnd Ellsbet wellen, so schull wir paide oder vnser ainz, di weil wir leben, allen vnsern gmach dar inn haben an alle irrung. wann aber wir paide abgen mit dem tod, so schulln all vnser eriben vnd frewnt auf dazselb haus cze Pyberpach mit aller czugehoerung chain recht vnd chainn czuspruch nach chrieg haben, weder mit recht nach an recht. Mit vrchund des offenn briefs, versigilt mit vnser vorgenantn Dyetreichs des Czauchinger vnd Nycla seines sun anhangunden Insigilln. Geben nach vnsers herrn Christi gepurd vber dreyczehen hundert jar, im syben vnd achtczikisten jar, an des heyligen pabst sand Vrban tag.

Source Fulltext: RAAB, Seitenstetten (=FRA II/33, Wien 1870) S. 338