Ich Larencz der Plesser, mein hausvraw vnd all vnser paider erbn, wir vergehen offenbar vnd tun chund mit dem gegenwurttigen brief allen laeuten, di nun lebent oder hernach chunftig werdent, daz wir mit wolbedachtem mut nach vnserr pessten frewnt rat vnd mit gutleichem willen, czu der czeit, da wir ez mit recht wol getun machten, recht vnd redleich habn verchaufft vnd habn cze chauffen gegeben dem ernwirdigen geistleichen herrn . . . dem Abbt vnd dem ersamen Conuent des Gotshaus cze Sitanstetn ain lehen, am annger hof gnant, in der pfarr cze Pyberpach gelegen, mit aller czugehorung, vnd dar zu gehort vmb czwai vnd czwainczik pfunt guter wienner pfenning, der wir von in gancz vnd gar gericht vnd gewert sein. Dazselb lehen cze angerhof, dar auf die czeit Nycla der Fuchss gesezzen ist, mit aller czugehorung, daz rechtes lehen ist gwesen von in vnd von demselben Gotshaus cze Sitanstetn, mit allen den ern, rechten vnd nuczczen, di dar czu gehornt, cze hollcz, cze velld, cze hofmarich, wismad vnd waid, bestifft vnd vnbestifft, besucht vnd vnbesucht, gepaut vnd vngepaut, wie daz allez gnant ist, vnd als ez von allter her ist chommen, haben wir auz vnserr nucz vnd gwer in gegeben vnd geantwurtt in ir nucz vnd gwer, Allso daz sev vnd all ir nachchommen vnd gabern allen irn frum damit schaffen vnd hanndeln schulln, mit innhabn vnd nyezzen, mit verseczczen vnd verchauffen vnd auch geben, wem sew wellent, an alle irrung. Wir haben vns auch des vorgenanten lehens am anngerhof mit aller czugehorung gaennzleich geauzzent, vnd wir tun vns auch des alles czu rechter furczicht mit dem brief, In der weys, daz wir vnd all vnser eriben hinfur dar vmb gegen in vnd dem eegenantn Gotshaus cze Sitanstetn vnd gegen allen irn nachchommen vnd gabern chainn czuspruch vnd chainen chrieg schulln haben, weder mit recht noch an recht. Vnd vergich auch ich vorgenanter Larencz der Plesser, mein hausvraw vnd all vnser eriben, daz wir schulln vnd welln auch des vorgenantn lehens am Anngerhof mit aller czugehorung des obgenanten geistleichen herren . . . des Abbts vnd des Conuents cze Sitanstetn vnd aller ir gaben rechter scherm, gwer vnd furstand sein fur all ansprach, an aller statt, wo in des mit recht von aller eribschaft wegen, wie di gnant ist, not vnd durfft geschiecht, als rechtes lehen vnd solichs chauffes recht ist in dem Lannd cze Oestereich. Gieng in aber daran icht ab, welicherlay schaedn sew dann des naemen, di ir ainer auz dem vor genantn Conuent cze Sitanstetn gesprechchen mag, vnberecht vnd vngeswarn, die selben schaeden schull wir in all ablegen vnd widerchern vnd sew schulln di schaeden mit sampt dem hauptgut haben auf vns vnd auf all vnserr hab, wo wir di haben, vnd sew schulln der schaeden vnd auch des hauptguts da von bechommen an chlag vnd an furbot, so sew nast mugen mit vnserm vnd vnsrer erben gutleichen willen, wir sein lebentig oder tod. Daz di red allso staet vnd vnuerchert beleib, dar vber czu einem sichtigen vrchund der warhait geb wir in den offenn brief wol bestaetigt vnd versigilt mit mein vorgenants Larenczen des Plesser anhangunden Insigil, vnd czu pezzer sichherhait hab wir gepeten den erbern vessten Ritter herrn Vlreichen von Rorbach vnd den erbern Gorgen den Steger, mein vorgenants Larenczen aidem, mit des will der chauf geschehn ist, daz sew der sache czeugen sind mit irn anhangunden Insigilln, in an allen schaden. Der brief ist geben nach vnsers herrn Christi gepurd vber dreyczehen hundert iar im syben vnd achiczigisten iar, an der heyligen vrawn sand Ellsbeten tag.

Source Fulltext: RAAB, Seitenstetten (=FRA II/33, Wien 1870) S. 338-340