Wir Laurencius von Gotes genaden Abpt czu Sytansteten vnd der gancz Conuent gemain doselbs vergehen offenbar mit dem brief vnd tvn chvnd allen den, di in an sechent, lesent oder hornt lesen, daz wir vnserm holden hainreichen am frawdenperig vnd Peterns seiner hawsfrawnn vnd irn paiden eriben vnd gabaern verlihen haben ain gut, am frewdenperig genant, czu rechtem purchrecht, also beschaidenleich, daz si vns alle iar douon dienn schullen an sand jorgentag dreyzczikch wienner pfenning, waer aber||
daz sew daz vor genant gut vor natdurft musten verchauffen, so schullen sew daz geben ainem gemainem pawmann, der ir genass sei vnd schol dann der auf vert vns geben czu anlayt czehen wienner phenning, vnd der ab vert geyt vns auch czu ablayt czehen wienner phenning, vnd sullen vns furbaz oder wer daz gut ynne hat, nychst mer gepunden sein, denn des vor genanten dinsts. Dar vber czu vrchund geben wir in den offenn brief, versigilt mit vnserm vnd vnsers Conuents anhangunden jnsigiln. geben nach Christi gepurd vber dreyczehen hundert jar, dar nach im czwain vnd Newnczkisten jar, am mantag vor sand Mathies tag, dez heyligen czwlifpoten.

Source Fulltext: RAAB, Seitenstetten (=FRA II/33, Wien 1870) S. 348-349