Ich Nydas czawchinger vnd ich Elspet sein muter vnd alle vnser eriben, wir vergehen offenbar vnd tun chund allen laewten, lemtigen vnd chunftigen, di den brief an sechent, lesent oder hoernt lesen, daz wir mit wol bedachtem mut vnd mit gutem willen nach vnser pessten frewnt rat, czu der czeit, do wir ez mit recht wol gethun machten, recht vnd redleich haben verchaufft vnd cze chauffen gegeben dem erwirdigen geistleichen herren hern Larenczen apbt des gotshauss cze Sytansteten vnd dem ersamen Conuent daselbs den czechent auf dem ainem velld des guts am Gredelekk genant, in der pharr cze Sytansteten gelegen, vnd di lehenschaft des czehents avf czwain luzzen, in den czwain chloster velden cze Sytansteten, di von dem selben gotshaus rechts lehen sind, vmb ain gellt, des vns wol hat genugt vnd des wir auch von in czu rechten tagen gancz vnd gar gericht vnd gwert sein, den selben czechent vnd lehenschaft mit aller czugehorung, gepawt vnd vngepawt, besucht vnd vnbesucht, hab wir aus vnser nucz vnd gewer in auf geben vnd geantwurt, in ir nucz vnd gwer, also daz sew allen irn frum domit schullen schaffen, mit ynne haben vnd nyssen, mit verseczzen vnd verchauffen vnd leihen, wem sew wellen, an alle irrung, wir verczeihen vns auch ganczleich des obgenanten czehents vnd der lehenschaft mit aller czu gehorung vnd wir tun vns auch des alles czu rechter fvrczicht mit dem offenn brief, also daz wir furbas darumb wider sew chainen chrieg vnd chainen czuspruch schullen haben, noch gewinnen, weder mit recht noch an recht, wir sein auch des vorgenanten czehents vnd der lehenschaft ir rechter scherm, gwern vnd furstand fur alle chrieg vnd ansprach, an aller stat, wo in des mit recht von aller erbschaft wegen not vnd dvrft geschiecht, als solichs chauffs vnd lehenschaft recht ist in dem lant cze Oesterreich. Gieng in aber icht ab mit recht an der gwerschaft, welherlay schaden sew dann des nement, di ir ainer aus dem Conuent des Gotshaus cze Sytansteten. vnbeswarn vnd vnberecht pei seinen trewn vor erbern laewtn gesprechen mag, die selben scheden schull wir in alle ablegen vnd gaenzlich||
widerchern an all widerred vnd schullen die schaden mit sampt dem hauptgut haben auf vns vnd auf aller vnser hab, di wir haben oder gewinnen auf wazzer vnd auf land, ez sei erbgut oder varundhab vnd sew schullen des alles douon bechommen an chlag, an furbot vnd an recht, so sew nast mugen, wir sein lebentig oder tod. daz di red also stet vnd vnuerchert beleib, dar vber geb wir den offenn brief czu pezzer sicherhait versigilt mit meinem vorgenants Nyclas des czawhinger anhangundn Insigil vnd mit meins liebn vettern Gengleins des Pernawer vnd Michels des Paulanter paider anhangunden Insigiln, in vnd irn erbn anschaden, di wir darvmb vleizzlich gepeten haben, hinder dew ich obgenante Elspet mit meinen trewn an aydes stat hab verpunden, alles das staet cze halten, das an dem brief geschriebn ist, wann ich selb aygen jnsigil nicht enhab. der brief ist gebn nach Christes gepurd vber drewczehen hundert jar dar nach in dem ainem vnd newnkisten Jar, an vnser frawn sand Marie Magdalene tag.

Source Fulltext: RAAB, Seitenstetten (=FRA II/33, Wien 1870) S. 347-348