Wir Laurencius von Gots gnadn Abbt des Gotshaws ze Sitanstetn vergehen offenbar vnd tun chund allen laeutn lebentigen vnd chunftigen di den brief ansehnt, lesnt oder hornt lesn, daz wir mit wol bedachten mut, nach guter bedechtnuss, mit vnsers Conuents cze Sitansteten will vnd gunst, durch des heilign Gotsdinsts fudrung vnd merung willen, recht vnd redleich haben verlihen dem Czechmayster der gmayn, den pfarrlaeutn ze Sitanstetn in ir czeche czu einem ewigen liecht in dem munsster für der heiligen chraewtzs alltar den ganczen czehent des guts vnd aller aekcher an der Puechen gnant pei dem Gredelekk, in der pfarr cze Sitanstetn gelegn, mit alle rechtn vnd nuczczen vnd mit aller czugehorung, besucht vnd vnbesucht, gepawt vnd vngepawt, denselben czehent eemaln layn von vnserm vor genantn Gotshaws czu recht lehn gehabt habnt, vnd den di obgenantn czechmayster gmayn vnd pfarrlaeut habnt gechaufft, vmb zwelif pfunt wienner pfennig, di sew gancz vnd gar gegebn, gericht vnd gewert habnt, in der beschaidn, daz sew vnd wem sew in lazzent, der in bestet vnd dingt, den vor genantn czehent des guts vnd aller aekcher an der puechen mit allen nuczczen vnd mit sampt dem stro all iar iaerleich schulln in uessenn vnd nemmen vnd den selign Gotsdinst czu nucz pringen. Vnd wann ain czechmayster cze Sitanstetn stirbt oder von dem czechampt wird geschaidn, als offt daz geschiecht, so schol sein nachchommen den obgenant czehent von vns oder vnsern nachchomen auch nicht besten, nach auf empfahen vnd schol in doch dennach all iar in vessenn vnd nemmen, vncs daz ain newer Abbt wirt cze Sitanstetn, als offt daz geschiecht, schol der eegenant Czechmayster cze Sitansteten den obgenantn czehnt von im besten vnd auf enpfahen vnd schol da von im cze anlaitt gebn sechczik wienner pfennig vnd nicht mer. Wann auch daz geschiecht, daz ander laeut von irn recht lehn ain gmayne stewr gebn wernt, so schol derselb zechmayster von dem vorgenantn czehnt auch mitleiden vnd vnserm Gotshaws cze stewr geben sechczik wienner pfennig vnd nicht mer. Mit vrchund des offenn briefs, versigillt mit vnser vorgenantn Abbts Laurencij vnd des Conuents cze Sitanstetn czwain anhangunden jnsigilln. Geben nach vnsers herren Christi gepurd dreiczehn hundert iar vnd in dem drei vnd newnczkiste iar, an des heilign Byschoff vnd lerer sand Ambrosij tag.

Source Fulltext: RAAB, Seitenstetten (=FRA II/33, Wien 1870) S. 351-352