Ich hanns vnd syman vnd jch stephel an dem Gobolt vnd Anna mein hausfraw vnd ich chuncel ze obernasbach, vnd Chunigunt mein hausvraw, vnd hensel der czeilinger, Wir vire geschwisttreit vnd die drei geswein vnd ich Jorg, hensel vnd Nicla vlreichs selign des prettels chinder, den goth gnad, vnd die obgenanttn seinew geswistreitt vnd geswein vnd all||
andrew vnser frewntschaft vnd all erbn lemptig vnd chumftig, wir vergehn vnd bechenen offenleich mit dem prieff fur alln lewtn, swo so der fur chumpt vnd gehort wirt von des tods wegn, so der erber chnecht Niclas der zawhinger an dem obgenanttn vlreichn dem prettel selign getan hat, daz sich derselb erber chnecht mit vns darvmb schon gericht vnd verebent hat nach ratt fromer vnd erberr lewt, da mit vns wol genugt hat, vnd zu der zeit, da wir is mit recht wol getun machtn vnd wir sagn in auch des selbn tods vnd aller der pessrung, si sei nach goth oder nach der wellt, die vns von im gesprochn ist, dar vmb ledig vnd lozz mit dem gegenwartigen prieff, daz wir all obgenantt nach niemant von vnsern wegn in chainerlay stukch nach wegn im nimermer schulln nach mugn darumb zu gesprechn, weder mit recht noch an recht, mit worttn noch werchen, vnd wer, daz vnder vns oder yemant von vnsern wegn an im vber fur, daz er bezewgn mocht mit czwain fromen mann, die daz gesagn mochtn pey irn trewn, an aid vnd vnberecht, der wer im vervalln vnd vellig leibs vnd guetcs an all gnad, dar inn mugn nach schulln sy nichts genissn weder ir hern nach ander herscheft. dar vmb geb wir all ob genantt den prieff zu einer warn vrchunt der sach vnd der verrichnuzz von des tods wegn, besillt mit der erbern vnd weisn anhangunden insigill, her walthers von sewsnek vnd mit ludweigs der Tyeminger vnd michhels des paulautter, die der sach zewg sint mit iren insigilln, in vnd alln irn erbn an schedn, die daz getan habnt durch vnser aller fleizzign pet willn, wann wir selber nicht aign insigill gehabt haben, vnd vnder der erbern irisigill verpindn wir vns mit vnsern trewn in aides weis an gever alles des stet ze habn, daz obn an dem prieff verschribn vnd benant ist, der gebn ist nach Christi gepurd drewzehn hundert jar dar nach im drey vnd newnczikstn jar, des nachstn suntags nach ostern.

Source Fulltext: RAAB, Seitenstetten (=FRA II/33, Wien 1870) S. 352-353