Ich Elspet, Hannsen des Hofmaisters selig witib von Tulbing vnd mit sampt mir all meinew kinder, jch lindel, jch chinczel jr sun, jch Gedraut, jch Margret, jch chunigund, jch Sweigmut, jch Agnes jr toechter vnd all vnser eribn, chvmftigen vnd nach chvmftigen, wir vergehen all vnverschaidenleichn vnd tun kund offenleichen mit dem brief allen laewten, den er fur kumpt, daz wir mutwilligleich nach des Edlen vnsers lieben genaedigen herren hern Hainreichs von wallsse vnd nach ander erberr laewt Weisung vnd rat vns frewntleichen vnd liebleichen mit einander bericht vn geebent habent, vmb all die ansprach vnd vodrung, so wir gehabt habn hincz vnserm genaedigen herren hern larenczen Abbt cze Sitansteten vnd hincz dem gegenwurtign gotzhaus da selbs, vmb ain gelt, daran vns wol genugt hat, dez wir gancz vnd gar bericht vnd beczalt sein, cze rechten tegen an all vnser scheden also, daz ich vor genant fraw Elspet vnd all meinew kinder vnd all vnser eriben chain ansprach noch vodrung tun noch habn svllen, mit recht, noch anrecht, in kainen wegen furbaz nimmer mer hincz vnserm egenanten herren vnd hincz dem gegenwurtign gotczhaus cze Sitansteten vnd hincz der Samnung des conuentcz daselbs vnd hincz allen jren nachkomen. waer aber, daz wir daz indert vberfurn vnd nicht stet hieltn, wie sich daz fuget von vnsern wegen, daz dem Gotczhaus schaden praecht, es wer wenig oder vil, nichtcz ausgenomen, so schullen wir vnsers leibs vnd all vnsers gutcz veruallen sein vnserm liebn genaedigen herren hern Hainreichen von wallsse. daz in daz alles staet vnd vnverchert beleib, dar vber gebn wir vorbenantn dem egenanten herren herrn larenczen abbt cze Sitansteten vnd dem erwirdigen gotczhaus vnd Conuent daselbs den offen brief cze einem vrkchund der warhait, versigelten mit der erbern Jacobs des Chirichperg vnd wernhartcz des Eczlinger, diczeit phleger cze wallsse, di ir jnsigiln czu pesserr sicherhait vnd geczewgnuss der sach durich vnser vleizzigen pet willen an den brief gehangen habnt in vnd allen iren eribn anschaden. darvnder verpint wir vns mit vnsern trewn an aides stat, allez daz stet cze habn, daz obn an dem brief geschribn stet, wenn wir aygener jnsigel nicht enhabn. Geben nach Christus gepurd drewczehen hundert jar darnach in dem vir vnd newnczkisten jar, am phincztag vor sand Goerigen tag.

Source Fulltext: RAAB, Seitenstetten (=FRA II/33, Wien 1870) S. 353-354