Ich Thoman der Grattl fleisschhakcher, purtig von waydhofen, mein hausfraw vnd all mein erbn, wir vergechen offenbar vnd tun chund allen lewtn, lemtigen vnd chunftigen, di den prief ansehent, lesent oder hornt lesen, daz wir mit wol bedachtem mut vnd mit gutem willen, nach vnser pessten frewnt rat, czu der czeit da wir daz mit recht wol getun mochten, recht vnd redleich habn verchaufft vnd ze chauffen geben dem erwirdigen geystleichen herren hern Larenczen Appt des Gotshauss czu Sitanstetn vnd dem ersamen Conuent daselbs, als vnser czehent, chlainen vnd grossen di wir gehabt habn in dem dorff dacz Rising, gelegn in Asschpekcher pharr vnd auch auf allen den Gruenten vnd akchern, di dar czu gehornt vnd von allter dar gehornt habnt, nichts dar in auzczogen, di wir cze lehn habn gehabt von dem ersamen Gotshaus cze Sitanstetn vmb ein gellt, des vns wol hat genuegt, vnd des wir auch von jn czu rechtn taegen gancz vnd gar gericht vnd gewert sein, dew selbigen czehnt mit aller czugehorung, gepawt vnd vngepawt, besuecht vnd vnbesuecht, hab wir aus vnser nucz vnd gwer aufgebn vnd geantwurt in jr nucz vnd gwer also, daz sew allen jrn frum damit schullen schaffn, mit inne habn vnd niessen, mit verseczzen vnd verchauffen vnd leyhen, wem sew wellent, an all vnser irrung. Wir verczeihen vns auch genczleich der obgenant czehent mit aller czu gehorung vnd wir tun vns auch des alles czu rechter furczicht mit dem offenn brief, also daz wir furbas darvmb wider sew chainen chrieg vnd chainen czuspruch schullen habn, noch gewinnen, weder mit recht noch an recht. wir sein auch der vorgenant czehnt ir rechter scherm, gewern vnd furstand fur all chrieg vnd ansprach an aller stat, wo jn des mit recht von aller erbschaft wegen not vnd durft geschiecht, als solichs chauffes recht ist in dem land cze Oestereich. Gieng in awer icht ab mit recht an der gwerschaft welcherlay schaeden sew dann des nement, di jr ainer auz dem Conuent des Gotshauss ze Sitanstetn vngesworen vnd vnberecht pei seinen trewn vor erber lewtn gesprechn mag di selbigen schaeden schull wir jn all ab legen vnd genczleich widerchern an all widerred, vnd schulln di schaeden mitsampt dem hauptgut habn auf vns vnd auf aller vnser hab, di wir habn oder gewinnen, auf wazzer vnd auf land, ez sey erbgut oder varund hab, vnd sew schulln des alles dauon bechomen an chlag, an furbot vnd an alles recht, so sew nachst mogen, wir sein lebentig oder tod. Daz di red also staet vnd vnuerchert beleib, dar vber czu einem sichtigen vrchund der warhait geb wir jn den offen brief, versigillten durch vnserr fleizzigen pet willen mit der erbern Engelprechts des hirtll, die czeit Richter czu Sitanstetn, vnd Joergens des Rathaiminger payder anhangundn jnsigiln, jn vnd irn erbn an schaden, hinder di wir mit vnsern trewn an aydes stat vns fur vns selb vnd fur all vnser erbn, lebentig vnd chunftig, habn verpunten, alles das staet ze habn, daz an dem brief geschribn ist, wann wir selb aygen jnsigil nicht habn. Der brief ist gebn, da man czallt von Christi gepurd drewczehen hundert jar vnd Syben vnd Newnczig jar, an nachsten Mittichen nach dem heyligen Prehentag.

Source Fulltext: RAAB, Seitenstetten (=FRA II/33, Wien 1870) S. 358-359