Ich Thomas der maurer von Sitanstetn, ich Margret sein hausvraw, ich Hanns der choch, ich Hainreich sneider, ichfridreich ir sun, vnd ich Barbara ir tochter, wir vergehn offenbar fur vns selb vnd fur all vnser erbn, lebentig vnd chunftig, vnd wir tun chund allen laeutn, di den brief ansehnt, lesnt oder hornt lesn, daz wir mit wol bedachten mut vnd mit gutn willn, nach vnser nasten vnd pesstn frewnt rat vnd nach erberr laeut weiswng, liebleich sein bericht mit dem erwirdigen geistleichen vnserm gnaedigen hern . . . dem Abbt vnd dem ersamen Conuent des Gotshaws cze Sitanstetn vmb all chrieg, mishelung, stozz vnd czuspruch vnd vmb alles eribrecht so wir gehabt habn auf dem gut Prachogellehn gnant, mit aller czugehorung in sand Michels pfarr gelegn, In der beschaidn, daz sew vns da fur habnt gebn ein gellt, des vns wol hat genugt, vnd des wir auch von in ezu rechtn taegen gancz vnd gar gericht vnd gewert sein, da von hab wir in dazselb prachvogellehn mit aller seiner czugehorung, ze holltz, cze velld, wismad vnd waid, haws vnd hofmarich auz vnserr nucz vnd gwer auf gebn in ir nucz vnd gwer, mit allen rechtn vnd nuczczen gestifft vnd vngestifft, gepawt vnd vngepawt, besucht vnd vnbesucht. Wir verczeichen vns auch gaenczleich des obgenantn prachvogellehn mit aller seiner czugehorung vnd aller rechtn di wir dar an gehabt habn, allso daz wir vnd all vnser eribn, lebentig vnd chumftig dar vmb wider sew vnd all ir hollden vnd laeut, di sew dar auf werdnt seczzen vnd di dazselb gut am prachvogellehn mit aller seiner czugehorung werdnt innhabn vnd besiczczen, chainn chrieg vnd chainn czuspruch schulln habn nach gebinnen, weder mit recht nach an recht. Vnd sew schulln vnd mugen da mit freileich allen irn frum schaffn vnd hanndeln mit innhabn vnd niezzen, mit verseczczn vnd verchauffn, mit stifftn vnd stoern, mit leihen vnd gebn andern pawlaeutn, di in zu holldn fugleich sein, In der weis, daz wir vnd all vnser eribn, lebentig vnd chunftig sew dar an weder mit wortn nach mit werchen nyndert schulln irren. Ob aber wir daz yndert vberfurn, welicherlay schadn sew dann des nement, di schull wir in all ablegn vnd wider chern daz lub wir in mit vnsern trewn an alles geuar. Mit vrchund des offn briefs zu pezzrer sicherhait durch vnserr fleizzign pet willn versigilt mit der erbern weisn Hannsens von Saeusenekk vnd Kristans von Sozz anhangunden insigilln, di da mit der vorgeschribn sache czeugn sind, in vnd irn erbn an schadn, dar vnder wir vns verpinden mit vnsern trewn an aydes stat, allez daz staet cze habn, daz an dem brief geschribn ist, wann wir selb aygnew insigil nicht habn. der brief ist gebn nach vnsers herrn Christes gepurd dreiczehn hundert iar vnd in dem siben vnd newnczkisten iar an, des heiligen martirer sand veits tag.

Source Fulltext: RAAB, Seitenstetten (=FRA II/33, Wien 1870) S. 359-360