In nomine sancte et individue trinitatis. Heinricus dei gratia VIus Romanorum imperator et semper augustus. Noverint tam presentes quam futuri, quod ea, que temporibus felicis memorie dilecti patris nostri Friderici Romanorum imperatoris et semper augusti auctoritate ipsius acta sunt, fideliter presenti scripto confirmamus, videlicet quod fidelis noster Rudolfus palatinus comes de Tuingen a beate memorie V^odalrico Spirensi episcopo et canonicis eiusdem ecclesie emit predium in Bebenhusen presentia et consensu tocius chori et ministerialium simul cum ecclesia in Bebenhusen et omnibus attinenciis eiusdem predii et dedit in concambium ecclesie Spirensi ecclesiam in Megenbodesheim et duos mansos in Witingen et predium, quod habuit Sidingen. Hoc concambium rationabiliter utrimque factum approbamus et utrique, quod in concambio accepit, perpetua volumus firmitate constare. Preterea prefatus comes palatinus in predicto predio Bebenhusen nostra coniventia monasterium construxit, cui predium ipsum cum omni usu assignavit. Hac autem libertate monasterium hoc fundatum est, ut secundum consuetudinem Cisterciensivm nec fundator neque ullus successor um eius aut heredum aliquid iuris advocatie habeat. Nos quoque divine retributionis intuitu et peticione dilecti nostri R(udolfi) palatini comitis eidem cenobio indulsimus in silva Schaienbuch hos terminos, quorum primus est, ubi confluunt duo rivuli Steinaha et Bulsteresbach, et descensus per eundem rivum, qui Steinaha vocatur, abhinc per ascensus montium usque ad Gebeharteseich, inde usque dum venias Tabernenbrunnen, abhinc usque Diffenclingen et per ascensus eiusdem vallis usque dum venias ad pratum, quod dicitur Kuononis, inde ad verticem proximi montis et per eius confinia usque ad sedes, hinc ad lapideum pontem, abhinc usque ad clivum, qui dicitur Hanensteigen, inde ad cornu, quod dicitur Alcgeresruiten, usque dum venias ad rivulum, qui dicitur Quirenbach, ad transitum vie Rheni, hinc descensus eiusdem rivuli, qui dicitur Quirenbach, usque in Steinahe, ut in hiis terminis ligna igni vel aliis usibus suis necessaria incidant. Quodsi in prescriptis terminis non reperiuntur ligna ad edificia eorum sufficientia, in tota silva, que dicitur Schaienbuch, liberam incidendi habeant facultatem, et pascuis tocius silve utantur exceptis ovibus eorum, quibus ibi depascendi non concedimus libertatem. Ad hec, quicumque ministerialis noster vel clericus vel mercator vel rusticus seu cuiuscumque conditionis vel sexus homo prenominato cenobio se ipsum in monachum vel conversum aut aliquid de rebus suis mobilibus vel immobilibus conferre voluerit, liberam faciendi cum voluntate et licentia nostra habeat potestatem. Ut igitur tam hoc doni nostri quam confirmationis beneficium sepedicto cenobio sub protectione et defensione nostra constructum in perpetuum cedat, presentem paginam inde conscribi fecimus et sigilli nostri inpressione iussimus insigniri firmiter precipientes, ne quis ausu temerario idem cenobium in aliquo infestare presumat. Quod qui presumpserit, in ultionem temeritatis sue imperiali fisco XXX auri libras persolvat. Huius rei testes sunt de clero Heinricus Wormatiensis episcopus, Otto Frisingensis episcopus, Cu^onradus prepositus Goslariensis, Lupoldus prepositus maioris ecclesie in Wormatia, Marquardus prepositus sancti Pauli, de laicis Heinricus dux Louanie, Heinricus dux de Limpurc et eius filii Heinricus et Walrauen, Emecho comes de Lininge, Fridericus comes de Zolre, Albertus comes de Werningerode, Gebehardus burcgravius Megdeburgensis et alii quam plures. Acta sunt hec anno incarnationis domini M^o  C^o nonagesimo III^o, indictione XI^a; dat. in Wormatia III kal. iulii.

Source Fulltext: Pferschy-Maleczek: Vorab-Edition Urkunden Heinrichs VI. für deutsche, französische und italienische Empfänger , 16.02.2020 , S. 248–250.(https://www.mgh.de/storage/app/media/uploaded-files/Urkunden_Heinrich_VI_deut_franzoes_italien_Empfaenger_DD_Vorabedition_Pferschy-Maleczek_2020-02-16.pdf)