IN NOMINE SANCTE ET INDIVIDUE TRINITATIS PEREGRINUS SANCTE AQUILEGIENSIS ECCLESIE DEI GRATIA PATRIARCHA. Quisquis superni muniris gratia pontificatus regimine sublimatus. oportet ut circa loca sancta et maxime religiosis cultibus dedicata. se affabilem et misericordem exhibeat. ac fratrum petitiones in eisdem deo famulantibus. iuste exaudire cum summa diligentia studeat. Ea propter notum sit omnibus ecclesie nostre fidelibus tam presentibus quam futuris. qualiter nos quidem Peregrinus sancte aquilegiensis ecclesie patriarcha ob remedium anime nostre et predecessorum nostrorum canonicam fratrum regularium sub beati Augustini regula degentium in Iunensi ecclesia fieri statuimus. ac interventu et petitione dilecti fratris nostri Romani eiusdem canonice venerabilis prepositi. prout iuste et legaliter possumus per hanc nostram preceptalem paginam. ea que pretaxate ecclesie sive canonice ad sustentationem fratrum inibi deo servientium concessimus. confirmamus atque corroboramus. scilicet Iunensem plebem in qua habita discretione regularis vite claustrum construximus. cum omnibus capellis et decimis. nec non cum omni iure quod in eadem plebe ad nos spectare videtur. hoc est cappellam sancti Lamberti. cappellam sancti Andree. cappellam sancti Viti. cappellam sancte Helene. cappellam sancti Joannis. cappellam sancte Marie obriach. Insuper autem plebem que est in Liwuelich cum duabus cappellis. quarum una sita est Luchwich. alia mise cum decimis et toto iure. Preterea partem decimarum in plebe de Scalach tam de vino quam de omnibus aliis que nostri iuris sunt. Cappellam vero sancti Georgii in monte cum suis universis pertinentiis. Statuentes et modis omnibus precipientes. quatinus nemo successorum nostrorum vel aliqua spiritualis secularisve persona de cetero predictum fratrem nostrum Romanum venerabilem prepositum suamque eccle-siam in honore beatissime Marie virginis dedicatam et ipsius pro tempore rectores vel fratres de supra memoratis plebibus cappellis. decimis. quem admodum superius legitur. molestare vel inquietare seu hanc nostram institutionem intuitu pietatis factam infringere presumat. Monemus itaque successores nostros et exhortamur in domino. ut quod nos eidem ecclesie caritatis affectu contulimus. ab ipsis semper firmum et inviolatum idem sentientibus permaneat. Quod ut verius credatur et firmius observetur. manu propria roborantes sigilli nostri inpressione supter insigniri iussimus. Actum est autem aquilegie. Anno dominice incarnationis millesimo centesimo quinquagesimo IIII. Indictione III. Sub die XIII. Kalendarum novembrium. In presentia nostra qua hoc fieri censuimus. Wernhardi Tregestini episcopi. Uodalrici archidiaconi, Bertoldi maioris ecclesie prepositi. Leopoldi abbatis Rosacensis. Thome vicedomini. Iringi abbatis Beleniensis. Ioannis abbatis Sextensis. Uodalrici abbatis Mosaciensis. Henrici sancti Stephani prepositi. et aliorum multorum Videlicet Ade episcopi emonensis. Vincentii parentini episcopi. Johannis petenensis episcopi.