... nach dem und mir der erber Jörg Wagner weilund sesshaft zu Traglwang in Gaisserpfarr innhallt briefleicher kunndschaft recht und redlich schuldig worden ist, darumb er mir und meinen erbenn zu rechtem furpfanndt ingesetzt hat den zehennt, so jarlichen gevellt auf der Röttlswaig mit seiner zueghorung, gelegen bey der Lüetznpruck under Lüetzen im Ennstal, darauf ich bemellter Muschman jud auf kayserlicher mayestat commission mit recht klagt behabt gwunnen und von newem von kaiserlicher mayestat bestätt erlanngt habe und mich des underziehenn und damit hanndlen wellen als sich geburdt hete. Aufsolchs bin ich obgedachter Muschmon jud von dem erwirdigen in got vater und herren herren Johannsen brobst sannd Niclas gotzhaws zu Rottenmonn und von dem wirdigen convennt daselbs mit brieflicher und trejfleicher kunndtschaft von kaiserlicher mayestat bestätt und ausganngen güetigklich ermondt und klarlichen darinn fannden dy jarzal und allter ires nutz und gwer an alle ansprach ersessenn. Das gedachter Jörg Wagner all sein erbenn kainerlay erbschaft noch gerechtigkait daran gehabt und unrechtlich versetzt oder verkaufft hat und darumb hab ich obgedachter Muschmon jud dem vorgedachten herrenn brobst, convennt und irer wirdigen stifft den beruerrten zehennt auf der Röttlswaig mit aller zueghorung... ganntz und gar übergeben.