O(takarus) dei gracia Dux Austrie (et Stirie) et Marchio Morawie Judicibus et omnibus, quibus littere iste monstrate fuerint, graciam suam et omne bonum. Noueritis, nos pruilegia fratrum in Wilheringe a Friderico quondam duce Austrie pie memorie nostro antecessore donata perspexisse et tenorem subnotatum in eis inuenisse. F. dei gracia Dux Austrie et Stirie et Dominus Carniole Judicibus et omnibus, quibus littere iste monstrate fuerint, graciam suam et omne bonum. Cum ordo Cisterciensium alium preter nos habere non debeat aduocatum, ipsos fratres et bona eorum in protectionem et graciam nostram recipimus specialem mandantes districte, ut nullus eosdem grauet per exactiones indebitas aut molestet jn hominibus aut in bonis scientes, quicunque (transgressor nostri mandati) extiterit, quod eundem non solum in rebus, uerum etiam in persona uehementissime puniemus. (Quod mandatum) in hominibus (claustri de) Wilheringen et in ipso claustro firmiter et districte sub obtentu gracie nostre precipimus obseruari. (Homines uero eiusdem claustri) exemptos esse uolumus a generalibus placitis sev priuatis, nisi propria uenerint voluntate. Nos vero proprie saluti prouidentes et meritorum dei seruos promouentium participes effici cupientes predictam graciam eisdem liberaliter indulgemus et Sigillo nostro confirmamus Mandantes uobis et districte precipientes, ut premissam eis donationem (inuiolabiliter obseruetis). (Datum in Lynza Anno Domini) M. CC. LII. IIII. kalendas Decembris.

Source Fulltext: OÖUB 3 (Wien 1862) S. 188, Nr. 196