Heinricus et Bernhardus fratres de Scho^umberch uniuersis christi fidelibus perpetuam in domino salutem. Vigilanti studio et propensiori cura, prout rerum casus postulat ea, que recte geruntur, ne incuria aut insolertia ullatenus obliuioni tradantur, scripto creduntur memorie commendanda. Ne igitur posterorum destruatur ignorantia uel leuitate, quod compositum est diligentia predecessorum, Nos Heinricus et Wernhardus de Scho^vmberch presentibus ac posteris constare uolumus legittimum quoddam et stabile concambium, quod factum est inter domum sancte Marie in Wilhering et fratres de Cell, Ditricum, Bernhardum et Leonem, uidelicet quod dominus Abbas Ernestus de Wilheringe cum consensu fratrum suorum dedit duo allodia, unum, quod dicitur Cogel, et alterum in Grillenberge et curiam in Sinzenauue, quam Fridericus dictus de Sinzenouue prenotate domui donauerat ob suorum ueniam peccatorum, pro quodam allodio sito in Neudorf, quod accesserat Ditrico de Cell ex patrimonio et ipse in dotem dederat uxori sue Heduuigi filie Pillungi. Ipsa uero domina Hedeuuigis uxor predicti Ditrici de Cell coram uiris prudentibus et honestis huic doti spontanee renuntiauit tali pacto, ut curiam in Sinzenouue pro recompensatione dotis sibi debeat assignari, quod et factum est. Quod si processu temporis quis domum de Wilheringe impetierit, pro suscepto allodio in Neuudorf sepe dicti fratres de Zell ipsum absoluere tenentur. Pari modo dominus Abbas de Wilheringe tenetur respondere pro curia in Sinzenouue. Proinde ne qua obliuionis incuria huius rei memoria poterit infirmari, necessario eam fecimus presentis charte descriptione annotare et sigillorum nostrorum munimine insigniri. Huius rei testes sunt Leůtoldus Pru^escinch, Marquardus de Alheimstorf, Wernherus de sancto Vito, Albertus Camerarius, Chunradus de Alheimstorf, Heinrich Volchrat, Wernhardus de Neussoltinge, Ditmarus de Mulberg, Wernhardus officialis et Vulfingus filius suus, Aluuikus iudex et filii sui, Wolfkerus officialis et alii quam plures. Actum in Greimharsteten Anno domini M. CC. LX. quarto, in festo Joannis Baptiste.

Source Fulltext: OÖUB 3 (Wien 1862) S. 320-321, Nr. 343