Ich Espein von Hag tun chvnt allen den, di disen brief sehent vnd ho^erent lesen, di nv sirit vnt noh werdent, Daz ich mit verdahtem mv^et vnd mit gutem willen meiner Hovsvrowen vron Offmeyn vnd meiner chinde Jacobes, Heinrichs vnd Chvnegunden vnd nah meiner vrevnd rat han geben durch got vnd ze selgeret ab meiner sel vnd ab meiner vodern sel vnd auch vmb Etlich phenning dem erbern abt Chvnraten ze wilhering vnd seiner Sampnvng mein Hvb ze Nevndorf bei wessenberch, di mein vreis aigen gewesen ist, vnd han auch ich vnd mein hovsvrowe vnd mein chinde, di vorbenant sint, di obgnant Hvb dem vorschriben apt vnd seinem Chloster ze wilhering redlich vnd gentzlich auf geben mit rechter vnd gantzer vurcicht also, daz di selben hub mit alle dev, vnd dar zv gehoret, ez sei an acher, an wisen, an holtz vnd swi ez benant ist, besuht vnd vnbesuht, daz vorgnant chloster vnd di Sampnvng ze wilhering in rehtes aigens gwer ledichlich besitzen vnd haben suln vurbaz an allen chrig. Ich gelob auch an disem brief, daz ich vnd mein hovsvrowe vnd meinev chinde, di ich nv han vnd noch gewinnen mach, suln sein der vorgnanten Hub vnd alles des dar zv gehoret des Chlosters vnd der Sampnvng ze wilhering gwer nah lantz reht, swa vnd swanne si des bedurfen, an allen ir schadeu vnd ir chost gen allen den, di sev vmb di vorgnanten Hvb ansprehent werdent. Vnd daz dem oft benanten chloster vnd der Sampnvng ze wilhering di vorgnant Hub ze Nevndorf ebichlich vnd staeˇt belib an allen chrig, so gib ich dem vorgnanten apt vnd seinem Chloster ze wilhering disen brief versigelten mit meines herren hern Eberharts von walsse jnsigel des Lantrichter ob der Ens vnd mit meinem jnsigel, vnd sint des zevg Her Heinrich von volchensdorf, her Ruger von hvtte, her perchtolt von harthaim, her vlrich von Lvdwichstorf, her vlrich von ydumsperg, her wernhart Gnevss, her heinrich von wuldenstorf, wernhart Sintzinger, philipp Gnevss, vlrich premzer, vlrich, heinrich, wernhart di Stainpechen vnd ander piderber levt genuch, den ditz chvnt ist. Ditz ist geschehen nach Christes geburd in dem Drevzehenhvndertisten jar ze sand Georen misse.

Source Fulltext: OÖUB 4 (Wien 1867) S. 341-342, Nr. 367