Ich Espein von Hag tvn chvnt allen den, di disen brief sehent vnd horent lesen, di nv sint vnd noh chvnftich werdent, daz ich mit verdahtem mvt vnd mit gutem willen meiner Hovsvrowen vron Offmeyn vnd meiner chinde Jacobs vnd Heinrichs vnd Chvnegunden vnd nah meiner vrevnde rat dem erbern apt Chvnraten vnd seinem Chloster ze wilhering gesatzzet han vuer Sechtzig pfvnt pfenning winner mvnzz mein Hub ze Nevndorf bei wessenberch mit allem dem nvtzz, den si von der selben Hvb gehaben mvgen, vnd sol auch der selbe nvtzz di weil, vnd ich niht lose, datz demselben Chloster mein selgeret sein, wer aber daz, daz ich di vorgnanten Hvb niht erlosen wolt oder moht, swelch oder swer danne vnder meinen gerben oder andern meinen vreunden, di nah meinem tot mein gut ze reht an erbet, di selben Hub haben wolt, der sol dem vorgnanten apt oder der danne da apt ist, vnd seinem Chloster ze wilhering geben Sechtzich pfunt pfenning winner mvnzz vnd vnderwinde sih also der vorgnanten Hvb. Daz dem oft benanten apt vnd seinem Chloster ze wilhering diser satz vnuerchert vnd an chrig beleib, so gib ich in ze vrchvnd disen brief versigelten mit meines herren hern Eberhartes von walsse jnsigel des Lant Richter ob der Ens vnd mit meinem jnsigel vnd sint des zevg her heinrich von volchenstorf, her Ruger von hutte, her Perchtolt von harthaim, her vlrich von ludwichstorf, her vlrich von ydumsperg, her wernhart Gnevss, her heinrich von wuldenstorf, wernhart Sintzinger, philipp Gnevss, vlrich pretnzzer, vlrich, heinrich, wernhart di Stainpechen vnd ander pidber levt gnvch. Ditz ist geschehen nah Christes geburd in dem dreuzehenhundertistem jar ze sand Georen misse.

Source Fulltext: OÖUB 4 (Wien 1867) S. 340-341, Nr. 366