Ich Chv°nrat von Chapell vergich vnd tůn chvnt allen den, di disen brief sehent vnd ho^erent lesen, di nv sint vnd noch chv^enftich werdent, duz ich mit dem erbern Abt chv°nraten vnd siner Sampnůng ze wilhering han auz gewehsselt miner Ho^ef zwen, einen ze Opprehtsperg, den andern ze Tenen vnd ein Lehen in dem Ternpach mit alle dev, vnd dar zv^e geho^ert, vmb siner Ho^ef zwen, di da ligent in dem Dorf ze Rudolfing, vnd vmb ein Lehen daselb mit alle dev, vnd dar zv geho^ert, also mit beschaidner red, daz der vorgnant Abt vnd sein Sampnůng ze wilhering di vorgenanten ho^ef ze Opprehtsperg vnd ze Tenen mit samt dem Lehen in dem Ternpach mit alle dev, vnd dar zv geho^ert besv^eht vnd vnbesvht, swi ez genant ist, sv^elen haben vnd besitzen in rehter aigens gwer ledichlichen an allen chrig Vnd wan des vorgenanten Chlosters aigen pezzer vnd tevrr ist danne daz mein, han ich dem vorgenantem Abt vnd siner Sampnůng ze wilhering ze pezzerůng vnd ze vbertevr gelobt vnd gegeben avf dem vorgenantem gu^et, daz mir von geantwůrt ist, dreizzich phv°nt phenning winner mv^enzze Also, swer ez inn haben vnd besitzen sol nah minem tot, der geb im diselben dreizzich phvnt phenning an miner stat, als gelv^ebt ist. Vnd wan der Hof ze Tenen von dem Pystům ze Pazzawe lehen ist, han ich dem vorgenantem Abt ChunRaten vnd siner Sampnůng ze wilhering gelv^ebt diselben lehenschaft auz ze pringen an alle sin mv^e vnd in aigens gwer machen im vnd sinem Chloster. Wer aber daz, daz ich des niht entaet vnd di vorgesprochen lehenschaft pi mir lebentigen niht auz praeht Vnd auch in di vorgenanten phenning niht gegeben wurden von dem, dem nach minem tot daz vorgenant gut angeuellet, alz hieuor gesprochen ist, So sol der vorgenant Abt Chunrat vnd sin Sampnu^eng ze wilhering sich irr Ho^ef vnd irs aigens wider vnderwinden vreilichhen vnd ledichlichn alsam e. Daz in daz stet vnd vnuerchert ebichlich beleibe, so gib ich in disen prief ze einem vrchv^ende versigelt mit mines herren jnsigel hern Heinriches des Eltern von Schovmberch, hern Eberharts von walsse des Lantrihters ob der Ens, hern Hainrichs von volchnstorf mins Ohaims, mit min selbes jnsigel vnd mit mines Geswins Albrechts von Chv°nring vnde bestetigt mit den zevgen, di hie geschriben sint. Daz ist her Ruger von Hu^ett, her Perhtold von Harthaim, her Rycher von Perchaim, her Espein von Hag, her Hainrich von Alharting, her Meinhart von Chlingelprv°nn, her Hainrich von Geroltzdorf, her HainRich von woldenstorf, wernhart von (Syntzing), Herwort der Rihter ze Lintz, HainRich vern Tv°ten sv°n, wernhart vnd hainRich prv^eder an dem vruar, Levpolt wernharts aidem (an dem vrfar, Rudolf) vnd Hainrich prv^eder ze Perg vnd ander piderb levt genuch, di da pei warn vnd chv^ent ist. Ditz (ist geschehen, do) von Christes Gebůrt waren Tausent jar, Drev hv°ndert jar, jn dem Ersten darnach an dem Sv^enwentag.

Source Fulltext: OÖUB 4 (Wien 1867) S. 396-397, Nr. 427