Ich Hainrich von Alharting vergich vnd tvn chvnt allen den, di disen prief sehent vnd horent lesen, di nv sint vnd noh chvnftich werdent, daz ich vnd mein Hovsvro^ewe vrô Diemv^et vnd minev chint Hainrich, Hertwich, Meinhart, Gedrv°t, Agnes, Diemv°t, Pendit, Elspet mit verdahtem mvt vnd mit gv°tem willen miner swester vrôn Penditen vnd aller irr chinde, swi di genant sint, nah vnser vrevnt rat vnd mit ir gantzer gv°nst dem erbern Apt Chv°nraten ze wilhering vnd siner Sampnvng vnsern Hof ze Compolting niden in dem Dorff, der vnser vreis aigen ist, verchavffen vnd haben verchavfft mit alle dev, vnd dar zv geho^ert, ez si an acher, an wisen vnd swi ez genant ist, gestift vnd vngestift, besvht vnd vnbesvht, redlichen vnd ledichlichen mit rehter wu^erziht mein vnd miner Hovsvro^ewen vnd miner chinde vnd miner swester als vor benant sint, vnd mit gůter verhancnv°zz aller miner erben, di reht dar an heten vnd haben mohten, also mit beschaidner red, daz den vorgenanten Hof datz Compolting mit alle dev, vnd dar zv geho^ert, swi ez genant ist, daz vorgenant Chloster vnd di Sampnvng ze wilhering in rehter aigens Gwer vreilichen vnd ledichlichen besitzen vnd haben sv°len wu^erbaz an allen chrig ebichlichen. Vnd sol ich vnd mein Hovsvro^ewe vnd minev chint als vorbenant sint vnd di ich noh gewinne, des vorgenanten Hofs vnd alles des, daz dar zv geho^ert, des Chlosters vnd der Sampnvng ze wilhering Gewer sein wu^er all vnser erben, di wir nv haben vnd noh gewinnen vnd gan allen den, di sev vmb den vorgenanten Hof ansprechent, swa vnd swanne si sein bedurfen nah lantz reht an allen irn schaden vnd an alle chost. Swa awer dem vorgenanten Chloster vnd der Sampnvng ze wilhering an diser gewerschaft iht abgieng, daz svlen si haben avf vnserm Hof ze Alharting vnd avf allem dem gvt, daz wir in dem lant haben, daz wir in dar vmb setzen vnd gesatzt haben. Daz diser chavf vnd dis bestetigvng stet vnd vnuerchert ebichlich beleibe, des geb wir dem vorgenantem Apt Chv^enraten vnd siner Sampnung ze wilhering disen prief ze vrchvnde versigelt mit mines herren jnsigel hern Hainrichs des eltern von Schovmberch, mins herren hern Eberharts von walsse des LantRihters ob der Ens, mins herren hern Hainrichs sines Prvders, mins herren hern Chv°nratz von Chapell, mins herren hern Albers von Chv°nring vnd mit minem jnsigel, vnd bestetigt mit den zevgen, di hi geschriben sint, Daz ist her Hainrich von volchenstorf, her Ruger von Hv^ett, her Reicher von Perchaim, her Espein von Hag, her Rudolf Schiver, her Sighart von Grvb, her vlrich von Lvdwigsdorf, her wernhart Gnevss, her Meinhart von Chlingelprvnen, her Hainrich von wuldenstorf, wernhart Sintzinqer, vlrich premzer, Rvdolf, Hainrich von Alharting, Helmhart von Schovmberch, Philipp vnd wernhart di Gnevssen, vlrich, Hainrich, wernhart di Stainpechen vnd ander pidber Levt genv°ch, den daz chvnt ist vnd da pei waren. Ditz ist geschehen nach Christes geburd in dem Drevzehenhv°ndertistem jar, dar nah in dem ersten jar an dem nehstem vritag vor dem Phingestag.

Source Fulltext: OÖUB 4 (Wien 1867) S. 393-394, Nr. 424