Ich Friderich von Staudech tun chvnt allen den, di disen brief sehent vnd horent lesen, di nv sint vnd noh chunftich werdent, Daz ich mit verdahtem mu^et vnd mit gutem willen meiner hovsvrôwen vron Leukarten vnd meiner chinde Ditriches, Rugers, Friderichs, Johans vnd Agnesen vnd nah meiner vreunt raˆt dem erbern apt Chunraten vnd seinem Chloster ze wilhering gesatzzet han vuer Sehtzig March lotiges Silbers mein baid Hube ze Nevndorf bei wessenberch mit allem dem nvtzze, den si von denselben Huben gehaben mvgen, vnd sol auh der selbe nutzz di weil vnd ich niht lose, datz dem selben Chloster mein selgerêt sein; wer aber daz, daz ich di vorgnanten hube niht erlosen wolt oder mo\vht, swelch oder swer danne vnder meinen gerben oder andern meinen vreunden, di nah meinem tot mein gut ze recht an erbet, di selben Huben haben wolt, der sol dem vorgnanten apt oder der danne da apt ist, vnd seinem Chloster ze wilhering Sehtzich march lotiges silbers geben vnd vnder winde sih der vorgnanten Huben. Daz dem vorgnanten apt vnd seinem chloster ze wilhering diser satz vnuerchert vnd an chrig beleib, so gib ich im ze vrckunde disen brief versigelten mit hern Ewerharts von walsse des LantRihter ob der ens insigel vnd mit hern Hainrichs von volchenstorf vnd hern Rugers von Hutte insigeln, wan ich selb niht insigels han. Ditz sint zevg: her ewerhart von walsse, her hainrich von volchenstorf, her Ruger von hutt, her Perchtolt von harthaim, her Espein von hag, her Reicher von Perchaim, her wernhart gnevss, her Meinhart von chlingelbrune, her heinrich von wuldenstorf, wernhart Syntzinger, Ditrich vnd Ruger des ammans svn von Ebelsperch vnd ander piderber levt gnvch. Ditz ist geschehen, do von Christes geburd waren Tausent jar, Dreuhundert jar, in dem andern jar ze pfingsten.

Source Fulltext: OÖUB 4 (Wien 1867) S. 414-415, Nr. 446