Ich friderich von Staudech tun chunt allen den, di disen brief sehent oder horent lesen, di nv sint vnd noh chvnftich werdent, daz ich mit verdachtem mut vnd gutem willen meiner Hovsvrowen vron Levkarten vnd meiner chinde Ditriches, Rugers, Fridrichs, Johans vnd agnesen vnd nah meiner vreunt raˆt mein baid hube ze Nevndorf bei wessenberch, di mein vreis aigen gewesen sint, dem erbern apt Chunraten vnd seinem chloster ze wilhering geben vnd vercho\vffet han vmb vier vnd Sechtzich pfunt pfenning winner mvnzz vnd han auh ich vnd mein Hovsvrôwe vnd meinev chint, di vor benant sint, di selben huben dem rorgnanten apt vnd seinem chloster ze wilhering redlich vnd gentzlich mit rehter vu^erciht auf geben also, daz si diselben huben mit alle dev vnd da zv gehoret, ez sei an acher, an wisen, an holtz vnd swi ez benant, besuht vnd vnbesuht in rehter aigens gwer ledichlich besitzen vnd haben suln vurbaz an allen chrieg, als ich sev gehabt han. ich gelob auch an disem brief, daz ich vnd mein hovsvrowe vnd meinev chinde, di ich nv han vnd noh gewinne, der vorgnanten huben vnd alles des, daz dar zu gehoret, des chlosters vnd der Sampnvng ze wilhering gwêr suln sein nah Lantsreht ze hof vnd ze taiding, swa vnd wann si sein bedurfen, an allen irn schaden vnd ir chost gen allen den, di sev vmb di vorgnanten Huben ansprechent werdent. Daz dem vorgnanten chloster vnd der Sampnvng ze wilhering di vorbenanfen Huben ze Nevndorf Ewichlich beleib (sic) an allen chrig, so gib ich in disen brief versigelten mit hern ewerharts von walsse des LantRichter oh der Ens insigel vnd mit hern hainrichs von volchenstorf vnd hern Rugers von Hutt insigeln, wan ich selb niht insigels han. Ditze sint auh zeug, di da bei gewesen sint: her Eberhart von walsse, her heinrich von volchenstorf, her Ruger von Hutte, her perchtolt von harthaim, her Espein von hag, her Reicher von perchaim, her wernhart Gneuss, her Meinhart von chlingelbrunne, her heinrich von wuldenstorf, wernhart der Syntzinger, Ditrich vnd Ruger des ammans svn von Ebelsperch vnd ander piderber leut gnuge. Ditz ist geschehen, do von Christes gepurd warn Tausent jar, Dreihundert jar, in den andern jar ze pfingsten.

Source Fulltext: OÖUB 4 (Wien 1867) S. 415-416, Nr. 447