ICH Elsbet di Smv^ekchin der erbern Herren von wilhering holdin ze wedling vergich vnd tv^en chvnt allen den, di disen brif sehent oder ho^ernt lesen, daz ich mit verdachtem mvt vnd mit gůtem willen ledichleichn pin gestanten mit sampt meinen chinden Otten, Fridrichn, Chvnraten vnd Elspeten vnd haben auch auf geben den halben hof ze wedling, do ich auf pin gesezzen den ersamen Herren abpt Hainrichn vnd seinem Gotzhaus ze wilhering, wand wir demselben gantzen hof von ... vnd von manigen presten nicht mer getv°n noch gepavn mochten vnd sol gaentzlichn der halb hof des Gotzhaus ze wilhering sein an allen chrieg also, daz di selben Herren schaffen irn frvm mit dem halben tail, wi si wellent, vnd daz ander halben tail des selben hofs ze wedling sol ich vnd meinev chint, als si vorbenant sint, inne haben vnd besitzen ze rechtem dinst vnd von dem halben hof geho^ert ze dienen also beschaidenlichn, daz ich vnd meinev chint iaerchleichn an sant Merteins tag vnd an vnser vrowen tag ze der Lichtmesse dem Gotzhaus ze wilhering geben vnd dienen svln an all widerred Ochtzich vnd drev phvnt phenning winner mvnz an daz marchfvter vnd daz purchrecht, daz wir geben svln von dem halben tail. Ich han auch gelobt mit sampt meinen chindern, swelichs jars ich oder meinev chinde den Herren ze wilhering ... nicht geben noch endienen irn dinst, daz ist Ochtzich vnd drev phunt phenning ze den taegen vnd si vorgenant sint, so sol daz selb halbes tail an dem Hof, daz wir haben svln, vnd alles vnser recht, daz wir haben svln vnd mvgen an dem selben hof ledich sein dem Gotzhaus vnd den Herren ze wilhering also, daz ich noch meiner chinder dhains aften dev nimmermer sol dhainen chrieg noch ansprach haben vmb den halben Hof. vnd daz daz gelubet vnd dis red den Herren ze wilhering stet ebichleichn beleibe, so gib ich in den brif versigelten mit des erbern Herren Hern dietrichs von graben vnsers voitz Insigel. Des sint zevg Her Hainrich engelceller hofmaister, Her vlrich Raitenhaslacher Hofmaister, Eberhart der stain der amman vnder den weinzvrl, wernhart der Toennein, Rueger Engelger, Leupolt sein průder, Chvnrat der sůmph, Jacob des alten ammans aidm, Chvnrat von wedling, hainrich der vogel, vlrich der snabel vnd ander piderb leut gnůch. daz ist ergangen do von Christs geburd waren Drevzehenhvndert Jar, dar nach in dem Ochtzehenten Jar an sant Gregorigen tach ze chrems in der Herren hof von wilhering.

Source Fulltext: OÖUB 5 (Wien 1868) S. 205-206, Nr. 207