Wir abpt Hainrich vnd di Sampnvng ze wilhering veriehen vnd tvn chvnt allen den, di disen brif sehent oder ho^ernt lesen, daz wir mit gu^eten willen vnd mit rat haben dem erbern mann vlreichen dem Streitwitz verlihen vnd ingeantwurt vnser aigen dev halbe Hvbe ze Hoennberg, daz erz sol inne haben in nůtz vnd in gwaer vntz an seinen tode mit sampt dem andern halffentail, daz sein rechtz erbe vnd aigen ist. Daz ist auch geschehen also beschaidenlichen, daz der selbe vlreich der Streitwitz paidev tail daz vnser vnd daz sein an der vorgenanten Hv°be ze Hoennberg an alle widerred sol besitzen vnd nu^etzen gaentzlichen vnd gar, di weil er lebt vnd daz er dauon vnserm Gotshaus nicht schuldich ist ze raichen noch ze gehen nv°r sein trew vnd sein lieb. Swann er aver schaidet von diser werlt, ze hant an allen chrieg der Rieder, di di gerben der Halben Hvbe ze Hoennberg ze naschst sint vnd wsern nach seinen tode, di da von ledichleichen gestanden sint, vnd auch an allen chrieg aller ander seiner erben, so ist sein tail vnd vnser tail, also dev gantzen Hvbe ze Hoennberg ledichleichn mit alle dev, vnd dar zv° geho^ert, des Gotzhaus ze wilhering, wand er sein halbes tail an derselben Hv^ebe geit ab sein sael dem Gotzhaus mit andern gu^eten taeten, des in got ermanet, doch des selben jars, vnd der selbe vlreich der Streitwitz tode leit, so sol sein Hovsvrowe vron Margaret, ob si in vberlebt, den halben dinst der selben Hvbe vessen vnd inn nemen mit gu^etlichen vnserm willen vnd dar nach ist dev Hvbe ze Hoennberg gantzev vnd gar mit alle dev, vnd dar zv geho^ert, des Gotzhaus ze wilhering aigenlichn vnd ebichleichn an allen chrieg aller seiner vrevnt. Daz dis red staet vnd vnuerchert also ebichleichn bestaee, des geb wir ze einem v°rchvude vlreichn dem Streitwitz disen brif versigelten mit vnserm Insigel vnd sint des zevg Her Ludweich der pharroer von Greymarsteten, Her Chvnrat von Gebrechtzhouen purchgraf ze Ottenshaim, Her Chvnrat Purchgraf ze woessenberch, Salmon, Ludweich von Ludweigsdorf, Ottaker, Fridrich vnd Symon di volchroet vnd ander piderb leut gnu^ech. Daz ist ergangen, do von Christes geburd warn Drevzehenhvndert Jar, dar nach in dem zway vnd zwaintzigisten jar an sant Laurentzen tach.

Source Fulltext: OÖUB 5 (Wien 1868) S. 335-336, Nr. 344