Wir Ditmar, Wernhart, walchvn vnd Hainrich pru^eder genant vnd gehaizzen di Rieder veriehen vnd tvn zewizzen an disem brif allen den, di in sehent oder ho^ernt lesen, daz wir mit gemainem rat vnd mit verdachtem mu^et vnd mit gutem willen aller vnser erben vnd auch vrevnt verchauft haben dem Gotzhaus ze wilhering vnd ledichleichn gestanden sein mit rechter fv^erzicht von der halben Hv^ebe ze Hoennberg, dev vns angeuallen waer aigenlichn nach vnsers vrevntes vlreichs des Streitzvitz tode an allen chrieg, wand wir di naechsten gerben sein, swenne er nicht enist, vnd haben daz getan mit solicher beschaidenhait, daz di Herren ze wilhering dev halben Hvbe ze Hoennberg, an der daz ander halftentail vor ir ist gewesen, an allen chrieg in nu^etz vnd in gwer mit alle dev, vnd dar zv gehort besucht vnd vnbesucht, swi ez genant ist, schvlen inne haben vnd ebichleichn besitzen nach vlreichs tod des Streitwitz, wer aver daz, daz ze chvmftigen Zeiten ieman vnser erben, di doch dhain recht fv^er vns an der vorgenanten Halben Hvbe ze Hennberg haben svlen noch enmv^egen, dar vmb chriegen wolten, di geben dem Gotzhaus ze wilhering zwelf phvnt phenning alter winner, di wir den Herren da selben ze einer ebentiwer vnd ze einer ebigen stetigvng dar vber setzen, vnd zihen sich danne zv der halben Hvbe ze Hoennberg vnd swaz an disen taiding dem Gotzhaus ze wilhering abgieng, den schaden svl wir im ablegen vnd svln daz haben auf alle dev, vnd wir oder vnser erben haben in dem Lant. Daz dis red staet vnd vnzebrochen ebichleichn beleibe, des geh wir dem Gotzhaus ze wilhering ze einem vrchvnd disen brief versigelten mit des Erberigen Herren jnsigel Hern Hainrichs von walse, wand vnser dhainer aigens jnsigels nicht enhat. Des sint zevg Her Chvnrat von Gebrechshouen Purchgraf ze Ottenshaim, Her Chvnrat Purchgraf ze wessenberch, Salmon vnd Ludweich von Ludweigstorf, Ottaker, Fridrich vnd Simon pru^eder di volchroet vnd ander piderb leut gnůch, den daz chunt vnd gewizzen ist. Daz ist geschehen, do von Christes geburd warn ergangen Drevzehenhvndert jar, dar nach in dem zway vnd zwaintzigisten jar an sant Laurentzen tach.

Source Fulltext: OÖUB 5 (Wien 1868) S. 333-334, Nr. 343