Ich Eberhart der Alt von walsse zv den Zeiten Lant Richter ob der Ens tuen chvnt allen den, di disen brief sechent oder horent lesen, Daz mir Dietmar der Osenpavm mit seinem gueten wiln vnd zv der (zeit, dv) er iz wol getuen niocht, ein aigenschaft aufgab auf einem guet, (Das haist) in der grueb, auf einer hueb, da Rechbein auf saz, vnd di selben Hueb (ze rechtem lechen von) mir nam. Do der vor genant Dietmar der (Osenpawm Stvrib, do schuef er) recht vnd redleich di selben Hueb ze Grueb dem (gotzhaws ze wilhering), da er leit; vnd dar vber han ich durich seiner sel wiln di aigenschaft vm di selben Hueb mit guetem wiln gegeben vnd geschaft dem Gotzhaus ze wilhering vnd gib in dar vber mein brief versigelt mit meinem jnsigel. Der brief ist geben nach Christes gepu^erd vber Drevzehen Hvndert jar, in dem vier vnd zwaintzgistem jar dar nach des Eritags nach dem Prechen tag.

Source Fulltext: OÖUB 5 (Wien 1868) S. 374-375, Nr. 380