Ich Leutoldt der Pru^eschinkh von Piberbach vnnd ich Ruger der Pru^eschinkh sein brueder Wu^er veriechen vnnd thuen khundt allen den, die disen brief sehendt oder ho^erendt lesen, das wu^er mit verainten Rhat vnd mit wol bedachten Mueth vnnd auch mit gueten willen vnser shwester vrow ... dem Erbern herrn Abbt Cunraten vnd der Sampnung ze Wilhering verkhaufft haben vnser Swaig ist gelegen im Gerstenthall, die mit drin holden gestifft ist, vnnd haben in die geben ze holz vnd ze velt mit alle dem vnnd darzue geho^ert, besuecht vnnd vnbesuecht vmb vier vnnd Sechzig pfundt alter Wienner pfenning mit so getaner beschaidenhait, ist, das Ich Leutoldt der Pru^eschinkh oder mein brueder Ruger die swaig in dem Garstenthall mit vnserm aignen Guett wider khauffen vnnd haben wo^ellen, daz mu^ege wu^er thuen in ains Jahr frist, daz ist am Sanct Jo^ergenstag, der schirst khumbt, oder vor also, das wu^er den ehe genanten Herrn ze Wilhering geben vier vnd Sechzig pfundt alter Wienner pfening in Ihrem Closter ze Wilhering, So ist die Swaig wider los vnd ledig, geschach des auer nit vnd die Vier vnd Sechzig phunt pfening in disem Jahr oder an Sanct Gergen nicht gaben, So sullen die Herrn vnd das Gottshaus daz Wilhering die swaig vnd die Guett in dem Gerstenthall als Sye deu von mir Leutolden den Pruschinkhen recht vnd redlich mit meines ehe genanten brueder Ruegers gunst vnnd vnser schwesster willen haben gekhaufft, in aigens gewehr ewigclichen halten vnd besizen vnd enmach noch scholl khainer vnserer Erben, ob wu^er die gewinnen, fu^erbaz an der shwaige in dem Gerstenthall khain recht haben. Darzue solt Ich Leutoldt der Pru^eschinkh mein prueder Ruger oder nach Vns vnser Erben oder nachst freundt der offt genanthen Herrn von Wilhering gwer sein nach landtsrecht fu^er alle anspru^ech, swa vnd swem in des durfftig ist, vnd shwan in daran abging, das sullen Sye haben auf allew deu vnd wu^er hie oben ob der Enns haben, daz diser khauff vnd der gwerfft, als Er vor bedeutet ist, den herrn vnd dem gottshavs ze Wilhering stets vnd vnzebrochen beleib, gebe wu^er Leutoldt vnd Ruger die Pru^eschinkhen in darvber disen brief versigelten mit vnser bayden Insigel vnd bestetigt mit den Zeugen, Das ist herr Espen von Haag, herr Vlrich der Pru^eschinkh, herr Ott von Perchaim, Fridrich der Pruschinkh, Ditmar von Aistershaim, Philipp von Alharting vnd ander Piderbar leuth genuch. Der brief ist geben, do von Christes geburth vergangen waren Dreyzehen hundert Jahr, darnach in dem zway vnnd dreyssigisten Jahr am Sanct Jo^ergen tag.

Source Fulltext: OÖUB 6 (Wien 1972) S. 61f., Nr. 52