ICH Graf Hainrich von Schovnberch vergich vnd Offen allen den, di disn brif sehent oder hornt lesen, daz di erbern mann Chvnrat der fu^erter, Ottacher vn Alber sein pru^eder mit zeitigem rat irr vrevnt vnd mit gutem willen ir vnd aller ir erben durch got vnd ze selgeret ab irr sael vnd aller irr vordern habent dem Gotzhaus ze wilhering gegeben ir rechtes vnd vreies aigen vnd dar auf nieman dhains rechtz geiehen vnd gesprechen mach, daz ist ein gůt ze Herstorf pei der Inn vnd ein gůt ze Prvk pei Pranpach vnd ein gut datz Roenhartzdorf in dem Haichenpach mit alle dev, vnd dar zv° gehort besucht vnd vnbesucht ze holtz vnd ze veld, ledichleichn vnd ebichleichn ze haben in rechter aigens gwer an allen chrieg vnd habent daz getan in solicher beschaidenhait, daz man von dem vorgenanten gůt iaerchleichn nach dem Svnnewenten an sand Peters abent den Herren ze wilhering in ir Refent gemainchleichn ze Pezzervng ir phrv^ent geben vnd dienen sol ein gu^et mal mit vischen vnd mit weizzem brot ze hail vnd ze trost ir sael. vnd daz dis gab vnd auch andacht stet vnd vnuerchert beleib, des gib ich dem Götz haus vnd den (herren ze) wilhering ze einem vrchvnd disen brif versigeltn mit meinem jnsigel vnd mit der vor (genanten bruder) Chvnratz, Ottachers vnd Albers der fu^erter jnsigel. Daz ist ergangen, do von Chri (stes gebu^erd warn) drevzehenhvndert jar, dar nach in dem zwayundreitzigisten jar an sand veites (tag des heyligen) martrer.

Source Fulltext: OÖUB 6 (Wien 1972) S. 67, Nr. 58