ICH Jans von Travn vergich offenbar vnd tvn chunt allen den, di disen Prif sehent oder hornt lesen, daz ich mit wol verdachtem mut vnd mit gůtem willen meiner lieben vrown vnd mvter vrôn Offmeyn vnd aller meiner geswistreit vnd nach aller meiner vrevnt (rat) han auf gegeben der (sic) Erbern gestlichen leuten dem abpt vnd der Sampnvng ze wilhering dev aigenschaft an dem Hof ze Obern Talhaim, den Vlreich von Talheim von meinem vater Hern Hertneit von Travn saeliger gehvgnu^ezze ze rechtem lehen weilent enphangen hat, vnd han dem Gotshaus ze wilhering dev aigenschaft mit rechter furzicht vnd mit gerachter hant ledichleichen gegeben, daz di Herren von wilhering mit dem selben Hof im frvm schaffen vnd den in aigens gwer ebichleichen inne haben an alles gevaer vnd an allen chrieg. Ich wil auch vnd sol mit sampt meinen vrevnten vnd Erben des selben Hofs ze Talhaim ir scherm vnd gwer sein nach Landes recht, swo in des not vnd durft geschiecht, an all widerred. Daz dis gab also, di ich vnd mein geswistreit ze einem saelgeret meins vorgenanten vater sael haben getan, dem Gotzhaus ze wilhering stet vnd vnuerchert beleib, des gib ich ze einem vrehvnd in disen Prif versigelten mit meinem Insigel Vnd sint des zeuch Her Ditreich von weisenberch, Her Vlreich der Pruschinch, Her Hainreich der Stainpech, Ditmar von Aystershaim, wernhart der Hager, alber vnd Philipp von alharting vnd ander Piderb leut gnůch. Do von Christes geburd warn Drevzehenhundert jar, in dem funf vnd Treizigisten Jar an sand Bartholomes tach.

Source Fulltext: OÖUB 6 (Wien 1972) S. 178, Nr. 171