Ich Nycla der Reche purger ze Ottenshaim vnd ich Chvnegund sein housvrow^e wir veriehen, daz wier ab vnserr vnd vnserr voruordern sei bei vnserm lebentigen leib haben geschafft vnd gegeben noch vnser baider tod sechs schilling wiener phenning geltes ouf vnserr mul, ist gelegen ze nidern Ottenshaim, di vnser vreyes aygen ist, den erbaern gaistlichen herren Abpt Hermann vnd der sampnung ze Wilhering durch der lieb willen, die wier zv^e vnser vrow/^n haben vnd zu^e dem selben Gotzhaûs, mit der beschaidenheit, swenn wier nicht mer sein, swer die selben mul denne inne hat noch vns, daz in der an alle verziechnusse vnd wider red do von schol raichen vnd dienen den vorgenanten dienst, daz ist sechs schilling wienner phenning an vnser vrow/^n tag ze der dienst zeit alle jar. Geschaech des nicht also, daz in daz dhaines jars verczo^egen wu^erd, so mugen si ouf der vo^ergenanten mu^el vmb den dienst vnd vmb daz wandel vreylichen gephenden samp ouf ander iers chlo^esters aygen. Vnd schullen si do von vnsern jartag begen noch iers o^erdens gwo^enheit vnd jaerchlichen an gotesleichnam tag ir phrunt mit visschen do von pezzern, als verr der dienst geraichen mag. Wir mu^egen aber alle iar die selben sechs schilling geltes ab losen wir oder vnser erben an den dienst mit acht phunten wienner phenning, do man anderswo als vil geltes dem Gotshous vmb schol chauffen vnd schol die losung allebeg geschehen zwisschen dem vorgenanten vnser vrow/^n tag vnd sand Mychahels tag. Wier schullen auch des vorgeschriben selgraets ir herren vnd gwer sein, swo in des du^erft geschiecht, wand gieng in von dhainerlay chrieg ichtes dar an ab, den lobe wir in auz ze richten wier oder vnser erben bei vnsern trewen noch landes reiht oder daz selb ervollen vnd erstatten von anderm vnserm gut, daz wir haben oder chunftichlichen gewinnen, vnd dar vber gebe wier den herren disen brief versigelten mit meinem oftgenants Nyclas jnsigel vnd zv einer pezzern zeugnuss mit hern Hainreichs des Pernawer ze den zeiten Purkgrauen ze Waessenberch jnsigel. Der brief ist geben, do man zalt von Christes gepu^erd dreutzehen hundert jar, dar noch in dem acht vnd viertzigistem jar an vnser Vrown tag ze der Liechtmesse.

Source Fulltext: OÖUB 7 (Wien 1876) S. 43f., Nr. 47