Ich Weichart von Topel, hofrichter in O^esterreich tvn chvntt offenlich mit disem brief, das her Reinbrecht von Schonnberch vor mir in dem hoftaiding ansprach den erbern herren abbt Vlrichen von Liligenveld vmb funf vnd sibenczig phenning geltes, di er im dienen solt von einer hofstat gelegen ze Chrembs zenechst Liligenvelder hof vnd chlagt hintz im darvmb als verre, datz abt Vlreich von Liligenveld seinen gavern (!) den erbern herren abt Hermann von Wilhering fur sich pat auf das nechst hoftaiding. Der selb sant fur recht den erbern gaistlichen man bruder Petern seinen hofmaister ze Chrembs mit vollen gewalt an seiner stat ze antwurten die clag vnd darnach chom der egenant her Reimprecht vnd pruder Peter fur recht vnd namen in einen tag mit recht wolbethvr (!) fur meinen herren herczog Albrechten ir sach da auz ze tragen auff denselben tag. Chom der egenant pruder Peter vnd nam dar vber meines herres prief, das er den tag gesucht hiet. Vnd chom her Reimprecht von Schennberch nicht als er sich vermezzen hat. Darnach in dem nechsten hoftaiding chom aber her Reinprecht fur recht nicht, das er sein chlag volfu^ert hiet, als er ze recht tv^en solt. Do chom der egenant geistleich man pruder Peter der hofmaister vnd pat mit vorsprechen vragen, was recht wer. Dem wart von den lantherren ertailt vnd veruolget mit frag vnd mit vrtail: Seid her Reinprecht von Schonnberch sein chlag niht volfurt hiet noch fur recht niht chomen wer, ez solt der egenant erber her abt Hermann ze Wilhering vnd sein gotzhaus furbaz von herrn Reimprecht von Schonnberch vmb die egenanten funf vnd subenczich pfenning geltes gerubt beleiben vnd allen iren fr um damit schaffen als mit anderm irem gut vnd sol sev dar an schirmen mein her der Hertzog nach des landes recht in O^esterreich. Der taiding gib ich disen brief ze einem vrchunde. Der geben ist ze Wienn nach Christes geburd vber drevtzehen hundert jar vnd in dem acht vnd viertzigistem jar, des mitichens vor sand Michelstag.

Source Fulltext: OÖUB 7 (Wien 1876) S. 72f., Nr. 73