Ich Fridreich, Vlreich vnd Reichel brüder weilund herrn Vlreichen sun dez Walichs wir verichen offenbar an disem brif vnd tun chunt, daz vnser anweilund fraw saligew gehugnusse di Gnaussin von sand Jorgen ab irer sel geschafft hat den erbern gaistlichen herren vnd dem gotzhaus ze Wilhering den dinst alain, der auf dem gut gelegen ist dacz Aw leyt pey Vraudenstain, do weilund der Czwichet auf gesessen waz mit der beschaidenhait, daz wir dennoch allew recht dar auf scholten haben daz ist stiften vnd sto^eren, anlaid, todrecht vnd stewr, bi ez genant ist vnd nur den plossen dinst dauon raichen dem vorgenanten Chloster. Dez selben rechtes haben wir vns durich der lieb willen, di wir zu dem gotzhaws haben, gancz leichen verczigen vnd den egenanten herren vnd dem chloster ze Wilhering daz vorgeschoben gut dacz Aw mit rechter furczicht aufgeben furbas besitzen vnd inn ze haben in rechten aigens gewer ledigleichen besucht vnd vnbesucht an allen chrieg also daz wir noch vnser erben noch de hainer vnser freund chunftichleichen chain recht noch vodrung, wi di genant sey, darauf sol haben, vnd dar vber geben wir dem gotzhaws ze Wilhering disen brif besigelten mit vnser vorgeschribener Fridreich vnd Vlreich Insigel vnd verpint ich mich Reichel vnder den selben, wann ich nicht aygens insigel han vnd zu ainer pessern sicherhait mit vnsers vettern insigel herrn Pilgramps(!) dez Walichs. Datum anno Domini M° ccc° xlviij. dez suntags nach dem Prehentag.

Source Fulltext: OÖUB 7 (Wien 1876) S. 42, Nr. 45