Ich Walchun der Regenspurger vnd all meine erben veriehen vnd tv^en chunt - - daz ich - - mit hern Wernhartz rat dez Wenagel zden zeiten pharrer ze Ottenshaim vnd nach Rv^egers rat von Hvmrechczried zden zeiten purkgraf ze Ottenshaim vnd auch richter daselbs - - geschafft vnd geben han gen Wilhering in daz refent all jar jaerleich ze raichen ain phunt phenning vmb semel, vmb weyn vnd vmb vissch. Man sol raichen jaerleich von meinem hauzz, daz da leit ze Ottenshaim an dem Ekk, do man get auf daz haus, ain halb phunt phenning alter wienner mv^enizz, vnd daz ander halb phunt auf meinem hof auf dem perig vnd von allen akchern, di dar zv^e gehorent. Man sol auch daz vorgenant phunt geltz raichen for sand Pernhartztag vierczehen tag. Geschaech dez nicht, wer dann richter ist ze Ottenshaim, der sol in phant antwv^erten, daz si di vorgenanten phenning da uon bol bechomen. Waer aber daz man nicht fvnd phant, so sol man in di grv^entt alz vil antwv^erten, daz si der phenning da bechomen. Vnd wann daz ist, daz man phent vmb die vorgenanten phenning, so sind dem richter verfallen zwelif phenning ze wandel. Waer aber daz mein erben wolten abchauffen daz vorgenant phunt geltz an ein andrew stat in den pu^erchfrid mit einer also gu^eten stat alz vor geschriben ist, dez sol man sev nicht i^erren. Waer aber daz si daz vorgenante phunt geltz nicht gar wolten abchauffen, so sol man si lazzen abchauffen dazhalb phunt geltz auf dem hauz oder daz halb phunt geltz avf dem hof vnd wer ie portner ist ze Wilhering, der sol daz phunt phenning inn nemen vnd daz geben dem conuent in den refent vnd den herren raichen ain gu^et mal, sol in daz phunt geltz geben vmb vissch, vmb weyn vnd vmb semel an sand Pernhartztag alle jar jaerleichen vnd ewigleichen. Man sol auch Hainrich des Regenspurger sel dem got genad vnd einer Chunegunden seiner hausvrown vnd Walters des Regenspurger vnd seiner zweier hausvrown Margreten vnd Annen, daz man der fvmf sel gedenchen sol an sand Pernhartztag mit einer vigil vnd an dem andern tag mit einer selmesse. Daz di red staet vnd vnzebrochen ewigleich beleib, gib ich disen brif versigelten mit meinem anhangunden insigel vnd mit Rv^egers insigel von Homrechczried, zden zeiten purkgraf vnd richter ze Ottenshaim, der iz an dem prif hat gelait ze ainem zevg im an schaden. Der bri^ef ist geben do man zalt von Christes geburd drevzehen hundert jar darnach in dem naewn vnd vi^ertzigisten iar, des mitichens nach vnser vrawntag ze der di^enstzeit.

Source Fulltext: OÖUB 7 (Wien 1876) S. 134f., Nr. 135