Ich Peter Jacobs svn des spytalmaister in der purger spytal ze Neunburch chlosterhalben vergich - daz ich - do ich wol vnd vollichleich zv meinen iaren chomen waz nach rat meins vaters - mit meins perchherren hant herrn Pilgreims des Würfel, zv den zeiten chorherr vnd obristen chelner des gotzhauzz ze Neunburch recht vnd redleich geben han durich Got lautterleich vnd ze vordrist - durich meiner sel vnd aller meiner vordern sel hail willen den erbern gaistleichen herren vnd dem gotshaus ze Wilhering mein halbs jeuch weingarten gelegen ze Neunburch an den Stellen zenachst Leupolts des Scho^ennherrn weingarten, der mein rechts anderstarbens eribguet ist, vnd der mir - geuallen ist an rechter tailung, do mein vater Jacob vnd mein mueter Kathrey, der Got genad, - mit gesampter hant - alle irev gu^eter, purchrecht vnd perchrecht vnd varund guter mit einander getailt vnd georndent vnd geschaft habent als der statbrief sagt, der daruber gegeben ist von dem rat der selben stat. Vnd von dem e genanten weingarten dient man alle iar ze perchrecht anderhalben emmer weins vnd ain phennich ze voytrecht an sand Goergen tag vnd nicht mer, also daz die selben herren ze Wilhering mit dem vor genanten weingarten fürbaz allen irn frum schaffen schulten - an allen chrieg. - Vnd daz die egeschriben red vnd wandlung staet beleib vnd vngebrochen, vnd wand ich nicht aygen insigel hab, darvmb so gib ich obgenanter Peter dem gotshaus ze Wilhering disen brief ze einem warn vrchund diser sach versigelten mit meins vorgenanten perchherren insigel her Pyllgreims des Wu^erphel insigel, vnd ze einem worn getzeug mit der erbern laeut insigeln herrn Jacobs des alten Slüzzlaer sun, ze den zeyten statrichter vnd judenrichter vnd herrn Wysents an dem Anger seis bruder vnd Hainrich des Du^erren zden zeiten des rats ainer, des ich sev gebeten hab. Der brief ist geben - dreutzehen hundert iar darnach in dem drev vnd fumftzkisten iar an sand Lucein abent.

Source Fulltext: OÖUB 7 (Wien 1876) S. 337f., Nr. 330