Ich Pilgreim der Walich und mein hawsvrowe vrowe Elsbet und all unser erben verjehen offenbar, daz ich geschaft han den erbern geistlichen herrn und dem gotzhaws ze Wilhering ain phunt phenning geltz alter wyenner mw^enzz auf dem gut daz do haizzet auf dem Eselsperch, und ist gelegen in Greymhartsteter pfarr, ab meiner sel und ab meinen hawsfrown und ab meiner chinder sel und ab aller der sel, di ich je betru^ebt (han mit) worten oder mit werchen haymlich oder offenlich, und ab aller meiner vorvordern und nachchomen sel. Und daz vorgeschriben phunt phenning geltz schol man dem gotzhaws ze Wilhering dienen in ier pitanz wer je des amptes phleger jaerchlichen an sand Michelstag. Und daz in di red staet und untzebrochen ewichlich belib daruber gib ich in den brief versigelten mit meinem anhangunden insigel, und ze einer pezzern sicherhait mit meiner vettern Fridreichs und Froenzleins der Woelich anhangunden insigeln. Der brief ist geben do von Christes gepurd ergangen warn dreutzehen hundert darnach in dem ains und sechtzkistem jar an der ainlefs tausent mayd tag.

Source Fulltext: OÖUB 8 (Wien 1883) S. 46f., Nr. 43