Wier abpt Walther und die sampnung ze Wilhering verjehen, daz wier Weinharten und seiner hawsrown vrown (leerer Raum) und allen iern erben verlihen haben unser gu^et auf dem Eselsperch, ist gelegen in Greymarsteterpharr. ze einem rechten eribrecht mit der beschaydenhait, daz si uns jaerchlchen davon schullen dienn in unser pytantz an sand Mychels tag ain phunt phenning alter wyenner mw^enzz. Wier haben auch auf dem vorgenanten gu^et nimmer vorderung weder stewr noch fu^er. Iz mag auch der vorgenant Wernhart und sein hawsvrowe und all ier erben verchauffen oder versetzen wem si wellen mit unserm gu^etleichen willen und wart, und wer verchauft der schol geben ze abfart zwelif phenning, und wer invert auch zwelif phenning, und in wes gewalt iz chu^empt mit chauff oder mit satzz, dem schulle wier alle dew staet tw^en di oben an dem brif geschriben ist. Wier mu^egen auch phfennten umb daz phfunt phenning geltz sam auf andern unsern gu^eten, und vor uns ze recht sten umb all sach und schol unsern scherm haben sam ander unsers gotzhawss holden. Und daz in di red staet und untzebrochen beleib, daruber geben wier in den brif versigelten mit unsern payden anhangunden insygeln. Der brif ist geben da man zalt von Christi gepu^erd drewtzehen hundert jar darnach in dem ains und sechtzkistem jar an der ainlef tawsent mayd tag.

Source Fulltext: OÖUB 8 (Wien 1883) S. 47, Nr. 44