Ich Fraentzl der Walich und mein vier sun Nicla Chunrat Georig Hans verjehen, daz uns di erbern geystlichen herren abpt Andre und die sampnung dez gotzhaus ze Wilhering verlihen und lazzen habent ain drittail ierr wiz, di gelegen ist im Purigwerd nahent pey Oetenshaim, ze einem rechten leibgeding nu^er ze funf leiben als vor benant sint, davon wier in aller jaerchlich an sand gorgen tag acht tag vor oder acht tag hinnoch dienen schullen sechtzig wienner phenning. Geschaech dez nicht, daz wier in den dienst vertzugen und nicht dienten alz vor geschriben ist, so hab wir alcz unser recht daran verlorn und mugen und schullen sich di vorgenanten gaistlichen herren ze Wilhering ierr wiz underztiehen und allen iern from damit schaffen alz mit anderm iern vreyen gut mit unserm gu^etlichem willen und an allen chrieg aller unserr erben und vreunten. Wann auch di leib absterbent alz si vor an dem brif genant sint, wi dann di vorgenant wiz ier drittail dann funden wirt nach unserm to^ed, also schullen si sich der wiz ledigleich undertziehen, und hat affendes dhainer unserr erben an der vorgenanten wiz daran nichtes nicht rechtens weder vil noch wenig. Und daz in di red also staet und untzebrochen beleib daruber gib ich vorgenanter Fraentzel Walich den obgeschriben gaistlichen herren ze Wilhering den brif versigelt mit meinem anhangunden insigel, und ze einer pessern sicherhait und zeugnuzz mit meins vetern hern Reychers und meins o^ehaim Sighartz des Gnaeussen anhangunden insigeln di ier insigeln durich meiner gebet willen an den brif habent an gehencht in an schaden. Der brif ist geben do von Christi gepord ergangen warn dreutzehen hundert jar darnach in dem siben und sechtzigisten jar an sand Mathias tag des heiligen zwelifpoten.

Source Fulltext: OÖUB 8 (Wien 1883) S. 310f., Nr. 315