Ich Albel der chamrer von Schownberch und mein housvrow Chunigund verjehen, daz uns unser genaedig gaistlich herren abpt Andre und di sampnung ze Wilhering lassen und verlihen haben ir hu^eb ze Nidernhartheym do weilent der Johensdorf'er ouff gesezzen ist, ze rechtem leibgeding nur ze unser baider leben also beschaidenlich, daz wier in allew jar jaerchlich dienen sullen an unserer vrawn tag ze der dienstzeyt oder darnach in virtzehen tagen fumf schaf chorn und fumf schaf habern ierr chastenmazze. Taet wir dez nicht, so hiet wier unser leibgeding und allew unsrew recht an der hub verlorn daz si sich der schullen undertziehen mit unserm gu^etlichen willen an alle widerred und an allen chrieg aller unsrer erben und vreunten. wir loben in auch di hub stiftleych inn ze haben und pawleich darauf ze sitzen daz si icht lezzer werde. Und wenne auch wier baidew nicht mer sein und mit dem tod abgenen, wi dann di vorgenant hub erfunden wierd ze welher zeyt daz im jar ist, also ist si dem vorgenanten gotzhaus ze Wilhering ledig worden und sulln sich der undertzihen mit allen den nu^etzen di darzu gehorent und da bechomen mu^egen ze holtz und ze veld versucht und unversucht an allen chrieg und an ierrung aller maenigchlichen, das afften dez niemant nichtz darnach ze sprechen hat weder vil noch wenig. Und daz dem vorgenanten gotzhaus ze Wilhering daz also staet und untzebrochen beleib daruber geb wir in ich vorgenanter Aelbel und mein hausvrow den brief mit unserer genaedigen herren graf Ulrichs und graf Hainrichs ze Schonberch anhangunden insigeln. Der brief ist geben do von Christi geburd ergangen warn dreutzehen hundert jar darnach in dem siben und sechtzkigistem jar an dem heyligen prehen tag.

Source Fulltext: OÖUB 8 (Wien 1883) S. 305f., Nr. 310