Jch Chunrat der Trattwerder mein eeliche Hawsfraw, all vnser Erben, wir verihehn vnd thuen khündt Offennleich mit dem brief allen den dye Jn sehen oder hörn lesen, das wir nach Ratt vnnser pessten freundt vnns verricht haben, Jch vnd mein Sün Heinrich der Trattwerder vmb allen krieg vnd zuespruch von der Hueb wegen ze Trattwerdt, Also mit der beschaiden, das wir dye Hueb daselbs mit einannderr taillen sullen, vnd ze gleichen tayll Bringen mit aller zugehörung, Als Sy von alter herkhomen ist ze Holtz, veld, Besuecht vnd vnbesuecht, nach Erber lewtt Rat vnd dy Erfinden vnd sullen das gen Jm vnd seinen Erben stätt haben vnd nicht wider reden, Auch Bekhennen wir¹⁾ vnd die behawsung der selben Hueben vnnserm Sün ledigcleich vor aus für die phingsten die schirist khomen vnd fürbas nichts damit ze schaffen haben on sein vnd seiner Erben willen vnd wart, Wir haben auch die Hueben verseczt vmb Syben phundt alter wyenner phenning da wir Jarlichen dauon dien ain phundt, dar Jnn soll vnns vnnser Sun die nägsten vier Jar ze Hylff khomen Järlichen mit ainem halben phundt phening, Lösen wir dann nicht Jn den vier Jaren, So soll vnser Sün vnd sein Erben fürbas vngolten Beleyben on Jrem halben tayll der Hueben des vorgenanten phündt phenning ze dinst vnd des Hawbtguts, Wir sullen auch des rechten dinst der auf der Hueben leyd gen Wilhering Järlichen geben fünff schilling phenning, vnd vnser Sün vnd sein Erben drey schilling von der Sölden wegen, die wir vor aus haben, Wär aber das wir die Tayding nicht stätt gen Einannder hielten vnd wolten daraus gen, Jch obgenanter Chunrat mein Erben oder mein Sün Heinrich vnd sein Erben wellicher tayll der wer, der wer mein Herrn von Wilhering vnd gen Schawnberg zehen phundt phenning verfallen, Das die redt also stätt vnd vnuerkhert beleyb geben wir Jn den brief, zu ainem warn sichtigen vrkhündt vnd stätter zewgnufs Besigelten mit vnnser gnedigen geistlichen herrn Abbt Hans vnd des Conuents ze Wilhering bayder anhangunden Jnnsigiln Jn vnd Jrem Gotzhaws on schaden, Darunnder Jch obgenanter Cunratt Trattwerder vnd vnuerschaidenlich all mein Erben vns verpintten mit vnsern trewen Jn aydes weys alles das stött haben vnd volfürn, das vor an dem brief verschriben stett, Wann Jch aygner Jnnsigl ze der czeit nicht hett, Der geben ist Nach Cristj geburdt vber Dreytzehenn hundert Jar vnnd Jn dem Sechß vnnd sybentzigisten Jar an sanndt Gallen tag.

Source Fulltext: OÖUB 9 (Wien 1906) S. 152-153