Wir Albrecht von gotes genaden, Bischof ze Pazza^ow bechennen, vnd tůn kunt offenleich mit dem brief, das vns der Ernwirdig vnd die gaistleichen vnser lieb in got der Abbt vnd der Conuent des Chlosters ze Wilhering vnsers Bistumes mit alten gůten briefen vnd vrkunden vnserr voruordern saligen redleich vnd genůgsamleich bewiset habent, das si vnd dasselb ir Chloster ze Wilhering genad vnd freyung haben iarchleich zů einem mal auf dem Jn vnd auf der Tůnaw^o ze Obernperg vnd ze Pazzaw^o, an vnsern vnd vnsers gotzhauss Maw^otten zů iren vnd des egenanten irs chlosters chost vnd notdůrften ein pfunt weits Saltz an Maw^ett, an zol vnd an alle fůruart frey ze fůren. Darumbe baten si vns diemůtlich mit vleizze, das wir in, vnd demselben irem Chloster die genad vnd freyung růchten zů besta^oten. Nů haben wir angesehen ir diemůtig pet, vnd wir haben in vnd irem vorgenanten Chloster zů vordrift durch gotz vnd ires strenngen orden, vnd auch durch vnserr, vnd aller vnserr voruordern vnd nachkomen sunder hail vnd salden vnd des ewigen Ion willen mit gunst vnd willen vnsers Ernwi^ordigen Capitels ze Pazzaw^o die egenanten ir genad vnd freyung vernew^ot vnd besta^ott vnd vernew^on vnd besta^oten die auch wizzentleich mit dem brief, so das si ein pfunt weits saltz an baiden vnsern Maw^otten ze Obernberg vnd ze Pazza^ow hin fur iarch leich ze einem mal an Maw^ott, an zol vnd alle fůruart frey fůren sullen in der mazz, so oben berůrt ist, daran si vnd das offtgenant ir Chloster von vns, allen vnsern nachkomen vnd auch von allen vnsern Maw^ottnern, Richtern, zollnern vnd andern vnsern Amptlaw^oten gegenwůrtigen vnd chůnftigen fůrbas ewichlich vnbeswärt vnd vngeirret sullen beleiben slechtlich an alles geuerd. Vnd des zů sichtigem vrkunde geben wir in den brief besigelten mit vnserm vnd mit des vorgeschriben vnsers ernwirdiges Capitels ze Pazzaw^o angehangen insigeln, die dasselb ir insigel ze zeugnüzze der obgenanten sach vnd hanndlung an den brief gehangen habent in vnd i^ors Capitels hab, doch an allen schaden, Der geben ist ze Pazzaw^o an sand Nicolai abent nach Christi gepurde drew^otzehenhundert iar vnd in dem siben vnd Sibentzigistem iare.

Source Fulltext: OÖUB 9 (Wien 1906) S. 363-364